រាជធានីភ្នំពេញ ៖ បុរសម្នាក់បើករថយន្ត កុងតឺន័រដឹកស៊ីម៉ង់ត៍ បានរេចង្កូត បុកសួនពុះចែកផ្លូវ បណ្ដាលឲ្យក្រឡាប់ផ្ងារជើងកាត់ទទឹងផ្លូវ តែម្តង កាលពីវេលាម៉ោង២យប់ថ្ងៃទី១៩ ខែតុលា ឆ្នាំ២០២១ នៅតាមបណ្ដោយផ្លូវវិមានឈ្នះៗ សង្កាត់គោករកា ខណ្ឌព្រែកព្នៅ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្ត ដឹកស៊ីម៉ង់ត៍ មួយគ្រឿង ដែលពាក់ស្លាកលេខ ភ្នំពេញ 3E-8115 បើកយ៉ាងលឿនគេចរថយន្ដមួយគ្រឿងទៀត មិនស្គាល់ម៉ាក ដែលបានបើកបញ្ច្រាសផ្លូវ ក៏បានរេចង្កូតបុកសួនពុះចែកផ្លូវ បណ្ដាលឲ្យរថយន្ដក្រឡាប់កាត់ទទឹងផ្លូវរងការខូចខាតយ៉ាងដំណំតែម្តង ។ ចំណែកឯអ្នកបើករថយន្តវិញ ពុំមានរងរបួសឡើយ។

ក្រោយពេលកើតហេតុ សមត្ថកិច្ចមូលដ្ឋាន បានទាក់ទងសមត្ថកិច្ចជំនាញចរាចរណ៍របស់ស្នងការដ្ឋាននគរបាលរាជធានីភ្នំពេញ ធ្វើការវាស់វែងនិងស្ទូចរថយន្តយកទៅរក្សាទុកនៅស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់៕ Mrr Ka