ខេត្តព្រះសីហនុ ៖ រថយន្តចំនួន០២គ្រឿង ត្រូវបានរងការខូចខាតយ៉ាងដំណំ បន្ទាប់ពីត្រូវរថយន្តស្ទូចដឹកឥដ្ឋ រអិលថយក្រោយបុកផ្ទប់មួយទំហឹង ខណៈកំពុងឈប់ស្តុប កាលពីវេលាម៉ោង ៣និង៤០នាទី ល្ងាចថ្ងៃទី២០ ខែតុលា ឆ្នាំ២០២១ នៅចំណុចស្តុប៣៣៣ ក្នុងភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។

ប្រភពព័ត៌មានពី សមត្ថកិច្ចចរាចរណ៍បានប្រាប់ឲ្យដឹងថា ដំបូងឡើយមានរថយន្តស្ទូចដឹកឥដ្ឋមួយគ្រឿង ម៉ាកហ៊ីយ៉ានដាយ ពណ៌ស ស្លាកលេខ ភ្នំពេញ 3E-2287 បានបើកមកដល់ស្តុប ហើយបានអកហ្សឺ បុកលេខមិនចូល ជាន់ហ្វ្រាំងមិនស៊ី ក៏រអិលថយក្រោយ មកបុករថយន្តស្តារិច ពណ៌ខ្មៅ ពាក់ស្លាកលេខ ភ្នំពែញ 2AQ-1005 ហើយជ្រុលមកបុករថយន្តមួយទៀតម៉ាក តាកូម៉ា ពណ៌ទឹកប្រាក់ ស្លាកលេខ 2BD-2564 បណ្ដាលឲ្យរងការខូចខាតយ៉ាងដំណំ តែម្ដង តែសំណាងគ្មានអ្នករងរបួសនោះទេ។

ក្រោយកើតហេតុ កម្លាំងសមត្ថកិច្ចនគរបាលចរាចរណ៍ផ្លូវគោក ក៏បានធ្វើការវាស់វែង យករថយន្ដ ទៅរក្សាទុកនៅការិយាល័យចរាចរណ៍ផ្លូវគោក ដើម្បីរង់ចាំដោះស្រាយនៅពេលក្រោយតាមនិតិវិធីផ្លូវច្បាប់ បន្តទៀត៕ សំណាង