រាជធានីភ្នំពេញ ៖ ពិតជារន្ធត់ណាស់ គ្មាននរណាធ្វើចិត្តបាននោះទេ .. ស្ត្រីជាប្រពន្ធ រួមទាំងសាច់ញាតិ បានរត់ផង យំផង ទន់ជង្គង់ទ្រហ៊ោយំ ឱបនិងបិទភ្នែកសពប្តី មិនគួរណាឡើយត្រូវជនជាតិចិន បើករថយន្តស៊េរីទំនើប បុកស្លាប់យ៉ាងរន្ធត់ ទាំងប្តីរបស់គាត់ ជិះម៉ូតូដល់ច្រកផ្លូវបត់ចូលផ្ទះទៅហើយ កាលពីវេលាម៉ោង ១១យប់ ថ្ងៃទី២០ ខែតុលា ឆ្នាំ២០២១ នៅចំណុចផ្លូវម៉ុងឫទ្ធី ចំណុចទល់មុខនិងបុរីជីបម៉ុង ក្នុងសង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។

តាមការរៀបរាប់របស់ស្ត្រីជាប្រពន្ធបានឲ្យដឹងថា ប្តីរបស់គាត់មានឈ្មោះ ថោង ឌីណា អាយុ៣០ឆ្នាំ រស់នៅភូមិសំយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋ នៅកន្លែងកើតហេតុ បានឲ្យដឹងថា មុនកើតហេតុ គេបានឃើញ បុរសម្នាក់ ជិះម៉ូតូម៉ាក PCX មួយគ្រឿង ពណ៌ស ពាក់ស្លាកលេខ ភ្នំពេញ 1GO -0318 តាមបណ្ដោយផ្លូវម៉ុងឬទី្ធពីលិចមកកើត លុះដល់ចំណុចកើតហេតុ ក៏បានបត់ឆ្វេងត្រឡប់ក្រោយ ឆ្លងទៅផ្លូវម្ខាងទៀត បម្រុងនិងបត់ចូលផ្ទះទៅហើយ បានពាក់កណ្តាលផ្លូវ ក៏ត្រូវរថយន្តស៊េរីទំនើប ខ្មៅរលោងស្រិល ម៉ាកអាល់ផាត ពាក់ផ្លាកលេខ ភ្នំពេញ 2AV-2799 បើកដោយបុរសជនជាតិចិន២នាក់ ពីកើតមកលិចក្នុងល្បឿនលឿនបុកជនរងគ្រោះចំពីមុខ ពេញទំហឹង បណ្ដាលឲ្យអ្នកជិះម៉ូតូ ផ្លោងខ្ទាត ស្លាប់យ៉ាងរន្ធត់។ ខណៈរថយន្តបង្កវិញ ខ្ទេចមួយកំណាត់មុខយ៉ាងដំណំ ហើយជនជាតចិនទាំង២នាក់ ក៏ត្រូវប្រចាពលរដ្ឋ ឃាត់បានប្រគល់ជូនសមត្ថកិច្ចផងដែរ។

ក្រោយកើតហេតុ សមត្ថកិច្ចមូលដ្ឋាន សហការជាមួយនឹងផ្នែកជំនាញចរាចរណ៍ បានចុះមកដល់កន្លែងកើតហេតុ និងបានធ្វើការវាស់វែង យករថយន្ត ម៉ូតូ និងជនជាតិចិន ទាំង២នាក់ ទៅកាន់ ការិយាល័យចរាចរណ៍ជំនាញផ្លូវគោក នៃស្នងការនគរបាលរាជធានីភ្នំពេញ ដើម្បីដោះស្រាយគ្នាតាមច្បាប់ និងប្រគល់សពប្តីឲ្យទៅសាច់ញាតិធ្វើបុណ្យតាមប្រពៃណី៕