ខេត្ត បាត់ដំបង ៖ អគ្គិភ័យមួយបានឆាបឆេះយ៉ាងសន្ធោសន្ធៅ ផ្តើមចេញពីការ បូមសាំងផ្ទេរពីរថយន្ត ទៅស៊ីតែន មិនបានប្រុងប្រយ័ត្ន ក៏ឆេះផ្អើលប្រជាពលរដ្ឋស្រែកឆោឡោហៅគ្នីគ្នាមួយជួយ និងខ្លះទៀតប្រញាប់រាយការណ៍ជូនសមត្ថកិច្ចដើម្បីហៅរថយន្តពន្លត់អគ្គិភ័យមកបាញ់ពន្លត់ កាលពីវេលាម៉ោង ៤ល្ងាច ថ្ងៃទី២០ ខែតុលា ឆ្នាំ២០២១ នៅចំណុច ក្រុមទី១៥ ភូមិឈើទាល ឃុំឈើទាល ស្រុកបាណន់ ខេត្តបាត់ដំបង។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា ករណីអគ្គិភ័យនេះ បានឆេះផ្ទះចំនួន០១ខ្នង ទំហំ ១២x៨ មែត្រ កម្ពស់ បីជាន់ របស់ម្ចាស់ឈ្មោះ ម៉ាន់ ចៃ ភេទ ប្រុស អាយុ ៤៩ ឆ្នាំ និងបានបណ្តាលឲ្យ រងរបួសមនុស្សម្នាក់ បានបញ្ជូនទៅមន្ទីរពេទ្យខេត្តបាត់ដំបង គឺជាអ្នកបើកបររថយន្តដឹកសាំង។

ក្នុងនោះក៏មានការអន្តរាគមន៍ពីខាង រថយន្តពន្លត់អគ្គិភ័យចេញ អន្តរាគមន៍ ចំនួន ០៥ គ្រឿង រួមមាន រថយន្តអធិការនគរបាលស្រុកបាណន់ចំនួន ០១ គ្រឿង, ស្នងការដ្ឋាននគរបាលខេត្តបាត់ដំបង ចំនួន ០៣ គ្រឿង , អធិការនគរបាលស្រុក សង្កែ ចំនួន ០១ គ្រឿង ដោយបានប្រើប្រាស់ទឹកអស់ចំនួន ១១ រថយន្ត ទើបរលត់ទៅវិញនៅម៉ោង ៨យប់ថ្ងៃដដែល ៕