រាជធានីភ្នំពេញ ៖ មានការភ្ញាក់ផ្អើលទាំងយប់ ខណៈបុរសម្នាក់ សង្ស័យស្រវឹង បានបើករថយន្តមកបុកខឿន ជាប់ប្រឡាយលូ ហើយក៏ជ្រុលធ្លាក់ចូលក្នុងប្រឡាយលូទឹកស្អុយ ត្រាំទឹកទាំងកណ្តាលរាត្រី ផ្អើលប្រជាពលរដ្ឋនាំគ្នាជួយគាស់ទ្វារស្រង់ឡើងមកលើគោក និងប្រទះឃើញកាំភ្លើង១ដើម នៅក្នុងរថយន្តថែមទៀតក៏ប្រគល់ជូនសមត្ថកិច្ចតែម្តង កាលពីវេលាម៉ោង ១ រំលងអាធ្រាត្រ ឈានចូលថ្ងៃទី ២៣ ខែតុលា ឆ្នាំ ២០២១ នេះ នៅចំណុចផ្លូវលេខ ១០៥ ក្នុងសង្កាត់បឹងត្របែកខណ្ឌចំការមន រាជធានីភ្នំពេញ ។

ករណីនេះ ក៏មានវីដេអូកាមេរ៉ាសុវត្ថិភាព បានថតបាន បង្ហាញពីសកម្មភាពពេលរថយន្តបើកបុកខឿនហើយធ្លាក់ប្រឡាយលូទឹកស្អុយ ផងដែរ ។

សូមបញ្ជាក់ថា ករណីនេះ ពិតជាសំណាងណាស់ ដែលមានប្រជាពលរដ្ឋដែលនៅម្ដុំនោះឃើញទាន់ បានលោតទឹកស្អុយនោះ ទៅជួយ ស្រង់ បុរសដែលជាប់នៅក្នុងរថយន្តក្នុងប្រឡាយលូទឹកស្អុយ ឡើងមកលើគោកសង្គ្រោះទាន់ពេល ហើយភ្លាមៗ កម្លាំងសមត្ថកិច្ច ក៏បានមកដល់កន្លែងកើតហេតុ ហើយព្យាយាមសួរនាំបុរសខាងនេះ តែគេបែរជាដើរទ្រេតទ្រោតពេញផ្លូវតែម្តង សួរលែងដឹងអ្វីទៅហើយ ត្រូវបានសមត្ថកិច្ចនាំទៅប៉ុស្តិ៍នគរបាលសិន រង់ចាំបុរសនោះស្វាង ទើបអាចសាកសួរនិងអាចទំនាក់ទំនងទៅរកក្រុមគ្រួសារគាត់ មកទទួលយកគាត់វិញ។ ហើយចំណែកឯរថយន្តដែលត្រាំទឹកស្អុយ ត្រូវរថយន្តស្ទូច ស្ទូចលើកឡើងមកលើគោកវិញហើយផងដែរ ៕