ខេត្តកណ្តាល ៖ បុរសម្នាក់២នាក់ បានចេញពីផឹកស៊ី បើករថយន្តម៉ាក ឡិចស៊ីស RX300 ធ្លាក់ចូលទឹកព្រែក ជាប់ក្នុងរថយន្តដាច់ខ្យល់ស្លាប់យ៉ាងរន្ធត់ កាលពីវេលាម៉ោង ១១និង២០នាទីយប់ ថ្ងៃទី២២ ខែតុលា ឆ្នាំ២០២១ នៅក្នុងភូមិព្រែកសែម ឃុំសំពៅពូន ស្រុកកោះធំ ខេត្តកណ្តាល ។

ប្រភពព័ត៌មានបានឲ្យដឹងថា អ្នកដែលស្លាប់ទាំង២នាក់ ទី១ឈ្មោះ ស៊ាង រី ភេទប្រុស រស់នៅក្នុងឃុំព្រែកស្តី ស្រុកកោះធំ ខេត្តកណ្តាល និងទី២ឈ្មោះ ហាក់ សេងលឹម ភេទប្រុស អាយុ៣៤ឆ្នាំ មុខរបរលក់ដីឡូត៍ ជាមិត្តភក្តិនឹងគ្នា ។ អ្នកទាំង២ បានបើករថយន្តម៉ាក ឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2BH-5293 ចេញពីហាងផឹកស៊ីមួយកន្លែង តាមផ្លូវបេតុង ពីលិចទៅកើត លុះដល់ចំណុចកើតហេតុ ក៏ធ្លាក់ចូលទឹកព្រែក ជាប់ក្នុងរថយន្ត លិចទាំងរថយន្តទាំងមនុស្ស ត្រាំក្នុងទឹក បណ្តាលឲ្យដាច់ខ្យល់ស្លាប់យ៉ាងអាណោចអាធ័មតែម្តង

បន្ទាប់ពីកើតហេតុ គេឃើញមានសមត្ថកិច្ចជំនាញពាក់ព័ន្ធបានចុះមកធ្វើការពិនិត្យ វាស់វែង និងស្រង់សាកសពអ្នកទាំង២ ដាក់រថយន្តសារ៉ែន របស់សមត្ថកិច្ចស្រុកកោះធំ ដឹកយកទៅប្រគល់ឲ្យសាច់ញាតិធ្វើបុណ្យតាមប្រពៃណី និងស្ទូចរថយន្តដែលលិចនោះ ឡើងគោកវិញផងដែរ ៕