រាជធានីភ្នំពេញ ៖ បុរសម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ បន្ទាប់ពីបានបើករថយន្តកូរ៉េឃ្លប់ដឹកទំនិញ ជ្រុកបុកគូទរថយន្តសណ្តោងទូរកុងតឺន័រពីក្រោយ ពេញទំហឹង កាលពីវេលាម៉ោង១២និង១៣នាទីថ្ងៃត្រង់ទី២៧ ខែតុលា ឆ្នាំ២០២១ តាមបណ្តោយផ្លូវជាតិលេខ៣ ក្នុងសង្កាត់ប្រទះឡាង ខណ្ឌកំបូល រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេឃើញ រថយន្តប្រភេទឃ្លប់ដឹកទំនិញពណ៌ស ពាក់ស្លាកលេខ ភ្នំពេញ 3E-6614 មួយគ្រឿង បើកបរដោយបុរសម្នាក់ ធ្វើដំណើរតាមបណ្តោយផ្លូវខាងលើ លុះដល់ចំណុចកើតហេតុ ក៏បានបុកពីក្រោយរថយន្ត សណ្តោងទូកុងតឺន័រមួយគ្រឿង ដែលបើកបរពីជើងទៅត្បូង បម្រុងបត់ឆ្វេងចំពីក្រោយពេញទំហឹង បណ្តាលឲ្យរងការខូចខាតខ្លួនឯង និងរងរបួសធ្ងន់ ។ ចំណែករថយន្តសណ្តោងទូរកុងតឺន័រ ក៏បានបើកចេញទៅបាត់ នៅសល់តែរថយន្តកូរ៉េឃ្លុប ត្រូវបានសមត្ថកិច្ចធ្វើការវាស់វែង ទៅយកទៅរក្សាទុកបណ្តោះអាសន្ន ៕ មេសា