រាជធានីភ្នំពេញ ៖ បុរសជនបរទេសម្នាក់ បើករថយន្តស៊េរីទំនើបមួយគ្រឿង ខ្វះការប្រុងប្រយ័ត្ន ជ្រុលល្បឿនទៅបុករបាំងថ្មសួនច្បារពុះចែកទ្រូងផ្លូវ រងការខូចខាតរថយន្តផ្នែកខាងមុខ យ៉ាងដំណំកាលពីវេលាម៉ោង៣ និង៤០នាទីរសៀល ថ្ងៃទី២៧ ខែតុលា ឆ្នាំ២០២១ នៅតាមបណ្តោយផ្លូវR៣ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសជាជនបរទេសម្នាក់ បានបើករថយន្តមួយគ្រឿង ម៉ាក ឡិចស៊ីស LM300h ពណ៌ខ្មៅ ពាក់ស្លាកលេខ ភ្នំពេញ 2BM-9111 បានធ្វើដំណើតាមបណ្តោយបេតុងពីលិចទៅកើត ខណៈមកដល់ចំណុចផ្លូវបេតុងកែងផ្លូវR៣ រថយន្តក៏បានបត់ឆ្វេងឡើងទៅផ្លូវR៣ ពេលកំពុងបត់ ស្រាប់តែរថយន្តជ្រុលល្បឿនរ៉េចង្គូតទៅបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យរថយន្តរងការខូចខាតផ្នែកខាងមុខយ៉ាងដំណំ និង ផ្ទុះពោងខាងក្នុង តែមិនបណ្តាលឲ្យនរណាម្នាក់រងរបួសឡើយ។

ក្រោយពេលកើតហេតុ កម្លាំងសមត្ថកិច្ចមូលដ្ឋាន បានចុះមកដល់ចំណុចកើតហេតុ រួចពិនិត្យមើលឃើញថា រថយន្តខាងលើបង្កគ្រោះថ្នាក់តែឯង មិនប៉ះពាល់ដល់អ្នកធ្វើដំណើរនិងខូចខាតរបាំងថ្ម ទើបសមត្ថកិច្ចសម្រេចឲ្យម្ចាស់រថយន្តយកទៅជួសជុលដោយខ្លួនឯង៕ នង មឿន