រាជធានីភ្នំពេញ ៖ រថយន្តស៊េរីទំនើបមួយគ្រឿង ម៉ាក Jaguar ពាក់ស្លាកលេខ កម្ពុជា MONIKA 09 ត្រូវបានពលរដ្ឋនៅទីតាំងកើតហេតុបញ្ជាក់ថា បានបើកលឿនដូចហោះ មកបុករបងការ៉ាស់លក់រថយន្តមួយកន្លែង រួចជ្រុលមកបុកជាមួយនឹងបង្គោលភ្លើងថែមទៀត បណ្ដាលឲ្យរថយន្ត ខ្ទេចយ៉ាងដំណាំ បង្កការភ្ញាក់ផ្អើលដល់បងប្អូនប្រជាពលរដ្ឋ កាលពីវេលាម៉ោង ១ រំលងអាធ្រាត្រ ឈានចូលថ្ងៃទី២៨ ខែតុលា ឆ្នាំ២០២១ នៅចំណុចលើផ្លូវបេតុង OCIC ត្រង់រង្វង់មូល ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

ប្រភពព័ត៌មានពីអ្នកឃើញហេតុការណ៍ បានឲ្យដឹងថា អ្នកបើកបររថយន្តទំនើបខាងលើ ក៏បានរងរបួសផងដែរ តែត្រូវបានប្រជាពលរដ្ឋ ជួយយកចេញពីក្នុងរថយន្ត ដោយឃើញមានបុរសម្នាក់ និងនារីម្នាក់ទៀត នៅក្នុងរថយន្តនេះ ហើយក៏បានចាកចេញពីកន្លែងកើតហេតុបាត់ស្រមោលតែម្តង បន្សល់ទុកតែរថយន្ត ត្រូវបានសមត្ថកិច្ចធ្វើការវាស់វែង យកទៅរក្សាទុក រង់ចាំដោះស្រាយគ្នាតាមច្បាប់បន្តទៀត ៕