រាជធានីភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើង រវាងរថយន្ត៣គ្រឿង បានបុករះបន្តកន្ទុយគ្នា ដោយ ផ្លោង១គ្រឿង ទើលើសួនច្បារចែកទ្រូងផ្លូវ រងការខូចខាតរៀងៗខ្លួន តែសំណាងល្អគ្មានអ្នករងរបួស នោះទេ បង្កការភ្ញាក់ផ្អើលកាលពីវេលាម៉ោង ៩ និង ១៥ នាទីព្រឹក ថ្ងៃទី២៨ ខែតុលា ឆ្នាំ២០២១ នៅតាមបណ្ដោយផ្លូវជាតិលេខ៦ ក្នុងភូមិសំបួរមាស សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តម៉ាក កាមរីឆ្លាម ពណ៌ទឹកមាស ស្លាកលេខ ភ្នំពេញ 2L-9058 បើកបរជើងមកត្បូង តាមបណ្ដោយផ្លូវជាតិលេខ៦ លុះមកដល់ត្រង់ចំណុចកើតហេតុ បានបត់ឆ្វេងត្រឡប់ក្រោយ ក៏ត្រូវបានរថយន្តហាយឡែនឌ័រ ពណ៌ខ្មៅ ស្លាកលេខ ភ្នំពេញ 2AE-7435 ស្របទិសគ្នាមកពីក្រោយ ជាន់ហ្វ្រាំងមិនទាន់ ក៏បុករថយន្តគូទរថយន្តឆ្លាមពេញទំហឹង បណ្តាលឲ្យបែកកញ្ចក់ខាងក្រោយ បែកកង់ក្រោយខាងស្ដាំ និងបែកស្តុបមុខខាងឆ្វេង រួចរុញរថយន្តទៅមុខបុកនឹងរថយន្តម៉ាកស៊ីណា ពណ៌ទឹកប្រាក់ ស្លាកលេខភ្នំពេញ 2 AG-6691 ដែលធ្វើដំណើរពីត្បូងមកជើង បណ្តាលឲ្យរេចង្កូតឡើងទៅទើលើសួនច្បារពុះចែកទ្រូងផ្លូវ និងបុកបង្គោលស្លាកសញ្ញាចរាចរណ៍ ដួលរលើងដល់ដី រងការខូចខាតកំពិតទ្វារក្រោយខាងឆ្វេង និងផ្ទះពោងសុវត្ថិភាព ទើបទៅមុខលែងរួច តែសំណាងល្អ គ្មានអ្នកណារងរបួសនោះទេ។

ក្រោយពេលកើតហេតុ សមត្ថកិច្ចចរាចរណ៍ខណ្ឌជ្រោយចង្វារ បានចុះមកដល់ទីតាំងកន្លែងកើតហេតុ ធ្វើការវាស់វែងនឹងយករថយន្ត ទៅរក្សាទុក នៅអធិការដ្ឋានខណ្ឌជ្រោយចង្វារ រង់ចាំការដោះស្រាយនៅពេលក្រោយតាមផ្លូវច្បាប់បន្តទៀត៕នង មឿន