ខេត្តព្រះសីហនុ ៖ ករណីគ្រោះថ្នាក់ចរាចរណ៍មួយ បានកើតឡើង រវាងម៉ូតូបុក ជាមួយរថយន្ដ ប្លោងមនុស្សជាច្រើនម៉ែត្រ ចេញពីម៉ូតូ បណ្តាលឲ្យបុរស២នាក់ រងរបួសបាក់ជើង កាលពីវេលាម៉ោង៩ និង៣០នាទី យប់ ថ្ងៃទី២៨ ខែតុលា ឆ្នាំ២០២១ តាមបណ្ដោយផ្លូវអូរឈើទាល ក្នុងសង្កាត់៤ ក្រុងព្រះសីហនុ ខេត្តព្រះសីហនុ។

ប្រភពព័ត៌មានពីប្រជាពលរដ្ឋ ដែលឃើញហេតុការណ៍ នៅកន្លែងកើតហេតុ បានប្រាប់ឲ្យដឹងថា ដំបូងឡើយ គេបានឃើញរថយន្ដ១គ្រឿង ម៉ាកHilux Revo ពណ៌ខ្មៅ ពាក់ស្លាកលេខ ភ្នំពេញ 2AX-2018 បានធ្វើដំណើរតាមបណ្ដោយផ្លូវអូរឈើទាល ទិសដៅពីជើងទៅត្បូង បន្ទាប់មកបានបត់ឆ្វេងឡើងទៅផ្លូវ ៥០៣ ។ ខណៈនោះ ដោយរថយន្ដមិនទាន់បត់ផុតផ្លូវ ស្រាប់តែមានម៉ូតូ១គ្រឿង ម៉ាក DREAM C125 ពណ៌ខ្មៅ ពាក់ស្លាកលេខ ព្រះសីហនុ 1H-4399 ជិះគ្នា២នាក់បើកបរក្នុងទិសដៅពីត្បូងទៅជើង ក្នុងស្ថានភាពលឿន ដោយជាន់ហ្វ្រាំងគេចពី

រថយន្ដមិនផុតជ្រុលទៅបុកពីមុខពេញមួយទំហឹង បណ្ដាលឲ្យប្លោងខ្ទាតចេញពីម៉ូតូ និង បណ្ដាលឲបុរស២នាក់ខាងលើនោះ ម្នាក់រងរបួសបាក់ជើង និងម្នាក់ទៀតរងរបួសបាក់ភ្លៅ ធ្ងន់ធ្ងរ ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះ។

ក្រោយពេលកើតហេតុ ចំពោះម៉ូតូនិងរថយន្ត ត្រូវបានសមត្ថកិច្ចធ្វើការវាស់វែង យកទៅរក្សាទុកនៅការិយាល័យចរាចរណ៍ ផ្លូវគោក ដើម្បីរង់ចាំដោះស្រាយគ្នាតាមច្បាប់បន្តទៀត៕ សំណាង