រាជធានីភ្នំពេញ ៖ រូបក៏ស្រស់ សម្រស់ក៏ស្អាត តែមិនដឹងមានវិបត្តិអី្វ ដើរឡើងលើស្ពានជ្រោយចង្វារ បម្រុងលោតទឹកបញ្ចប់ជីវិត តែសំណាង ត្រូវបានសមត្ថកិច្ចនៅគោលដៅ ជួយឃាត់ទាន់ពេលវេលា នាំចុះពីលើស្ពានវិញ បង្កការភ្ញាក់ផ្អើលកាលពីយប់ ថ្ងៃទី២៨ ខែតុលា ឆ្នាំ២០២១ នៅចំណុចស្ពានជ្រោយចង្វារ សង្កាត់ជ្រោយចង្វារ ខណ្ឌជ្រោយចង្វារ រជធានីភ្នំពេញ។

ប្រភពព័ត៌មាន ពីបុរសម្នាក់ ដែលជាអ្នកបើករម៉កម៉ូតូកង់បី ដឹកស្ត្រីស្រស់ស្អាតខាងលើ មកដល់ចំណុចកើតហេតុ បានឲ្យដឹងថា មុនពេលកើតហេតុ គាត់បានដឹកនារីរូបនេះ មិនចេញពីម្តុំវិមានឯករាជ្យ ដោយប្រាប់គាត់ឲ្យបើកឡើងទៅស្ពានជ្រោយចង្វារ ស្រាប់តែមកដល់ចំណុចកើតហេតុ ស្ត្រីខាងលើ ក៏បានឲ្យបុរសអ្នកបើកកង់បីឈប់ គាត់ក៏ឈប់ ពេលនោះ គាត់មើលទៅមិនស្រួល ក៏ប្រញាប់ប្រញាល់បើកកង់បី មកដល់ចំណុចគោលដៅប្រចាំការរបស់សមត្ថកិច្ច ឲ្យសមត្ថកិច្ចប្រញាប់ឡើងទៅមើលនិងជួយឃាត់ស្ត្រីខាងលើ ក៏ឃើញស្ត្រីនោះ បម្រុងនឹងលោតទឹកសម្លាប់ខ្លួនទៅហើយ សំណាងណាស់ ត្រូវបានកងកម្លាំងអន្តរាគមន៍ របស់អធិការដ្ឋាននគរបាលខណ្ឌជ្រោយចង្វារ ជួយឃាត់ទាន់ ។

ក្នុងនោះ បើតាមការសាកសួរទៅលើស្ត្រីរងគ្រោះខាងលើ បានរៀបរាប់ថា ខ្លួនមានវិបត្តិផ្លូវចិត្ត ជាមួយនឹងគ្រួសារ ដោយសារតែខឹងប្ដីរបស់គាត់ មិនបានចូលផ្ទះ ទើបគាត់សម្រេចចិត្តចង់បញ្ចប់ជីវិតចោលកូនរបស់គាត់ នៅលើស្ពានជ្រោយចង្វាតែម្ដង តែត្រូវប្រជាពលរដ្ឋនិងសមត្ថកិច្ចឃាត់ទាន់ ក៏ធ្វើការសាកសួរនាំ នឹងទំនាក់ទំនងទៅក្រុមគ្រួសារសាច់ញាតិ ឲ្យមកទទួលយកត្រឡប់ទៅផ្ទះវិញ ៕ Mrr Ka