រាជធានីភ្នំពេញ ៖ រន្ធត់ណាស់ស្ត្រីម្នាក់ បានស្លាប់ពេលបញ្ជូនទៅមន្ទីរពេទ្យ ។ ចំណែកបុរសម្នាក់ទៀតរងរបួសធ្ងន់ ខណ:ដែលជិះម៉ូតូឌុបគ្នា វ៉ាជែងរថយន្តខាងមុខ ធ្លាក់ជង្ហុកដួលចូលរថយន្តកិនស្លាប់ បង្កការភ្ញាក់ផ្អើលកាលពីវេលាម៉ោង ១០ព្រឹក ថ្ងៃទី២៩ ខែតុលា ឆ្នាំ២០២១ នៅតាមផ្លូវហាណូយ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

សមត្ថកិច្ចបានប្រាប់ក្រុមការងារ TVFBឲ្យដឹងថាជនរងគ្រោះមាន ឈ្មោះតេង មុំ អាយុ ៥២ឆ្នាំ ស្នាក់នៅសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ចំណែកអ្នកបើកបររថយន្តមានឈ្មោះ ឡេង ចាវ ភេទប្រុសអាយុ ២៨ឆ្នាំ មានលំនៅ ភូមិ សារិកាកែវ ឃុំជើងរាស់ ស្រុកឧដុង្គ ខេត្តកំពង់ស្ពឺ ។

ប្រភពព័ត៌មានពីបងប្អូនប្រជាពលរដ្ឋនៅកន្លែងកើតហេតុ បានឲ្យដឹងថា មុនកើតហេតុ បុរសម្នាក់ បានជិះម៉ូតូឌុបម៉ូយ ដែលជាស្ត្រីរងគ្រោះខាងលើ ធ្វើដំណើរតាមផ្លូវហាណូយ ពីជើងទៅត្បូង ដល់ចំណុចកើតហេតុ វ៉ាជែងរថយន្តខាងមុខ ជាអកុសល ធ្លាក់ជង្ហុក ក៏រអិលដួល ខ្ទាតស្ត្រីរងគ្រោះចូលរថយន្ត កូរ៉េ ដឹកក្តាកុងផ្លាកេ កំពុងបើកពីជើងទៅត្បូង បណ្តាលឲ្យបុកកិនស្លាប់ស្ត្រីម្នាក់ ដែលជាម៉ូយជិះម៉ូតូឌុបនោះ ស្លាប់ពេលរថយន្តគ្លីនិកដឹកយកទៅ ចំណែកបុរសជាអ្នកបើកម៉ូតូរងរបួសធ្ងន់ ។

ក្រោយកើតហេតុ ដោយដឹកទៅមន្ទីរពេទ្យក៏ស្លាប់ ទើបរថយន្តសាមុយ បានដឹកត្រឡប់មកកន្លែងកើតហេតុវិញ រង់ចាំឲ្យសមត្ថកិច្ចជំនាញពិនិត្យ ប្រគល់សពជូនក្រុមគ្រួសារដឹកយកទៅធ្វើបុណ្យតាមប្រពៃណី ។ ចំណែករថយន្តនិងម៉ូតូ រួមទាំងអ្នកបើកបររថយន្តផងនោះ ត្រូវបានប្រគល់ឲ្យការិយាល័យចរាចរជើងគោក នៃស្នងការដ្ឋាននគរបាលរាជធានីភ្នំពេញ កសាងសំណុំរឿងតាមនីតិវិធីច្បាប់៕ មេសា