ខេត្តព្រះសីហនុ ៖ បុរសម្នាក់ ជិះម៉ូតូក្នុងល្បឿនលឿន ដួលខ្លួនឯង បណ្តាលឲ្យបោកក្បាលនឹងថ្នល់ បែកលលាដ៍ក្បាល ស្លាប់ភ្លាមៗ ខណៈម៉ូតូវិញអូសជាច្រើនម៉ែត្រ បង្កការភ្ញាក់ផ្អើលកាលពីវេលាម៉ោង ១១និង៣០ នាទីយប់ ថ្ងៃទី២៩ ខែតុលា ឆ្នាំ២០២១ នៅតាមបណ្ដោយផ្លូវអូរឈើទាល ក្នុងសង្កាត់៤ ក្រុងព្រះសីហនុ ខេត្តព្រះសីហនុ ។

ប្រភពព័ត៌មានពីពលរដ្ឋដែលបានឃើញហេតុការណ៍ បានបញ្ជាក់ប្រាប់ក្រុមការងារ TVFB ឲ្យដឹងថា ដំបូងឡើយ គាត់បានឃើញបុរសម្នាក់ជិះម៉ូតូម៉ាក HONDA DREAM C125 ពណ៌ខ្មៅ ពាក់ស្លាកលេខ កំពត 1R-7144 ធ្វើដំណើរតាមបណ្ដោយផ្លូវ អូរឈើទាល ទិសដៅពីកើតទៅលិច ក្នុងល្បឿនលឿន ខណៈពេល ដែលមកដល់កន្លែងកើតហេតុ ស្រាប់តែដួលម៉ូតូ ប្លោងមនុស្សចេញពីម៉ូតូ បោកក្បាលនឹងថ្នល់បែកលលាដ៍ក្បាល ស្លាប់បាត់បង់ជីវិតតែម្ដង ខណៈម៉ូតូអូសជាច្រើនម៉ែត្រ។

បន្ទាប់ពីកើតហេតុភ្លាមៗ សមត្ថកិច្ចនៅគោលដៅនោះ បានខលហៅរថយន្ដសង្គ្រោះបន្ទាន់ ដើម្បីជួយសង្គ្រោះជនរងគ្រោះ ប៉ុន្តែជនរងគ្រោះ បានផុតដង្ហើមបាត់ទៅហើយ និងបានទាក់ទងទៅគ្រួសារសព ដើម្បីឲ្យដឹងពីព័ត៌មាននេះ និងមកទទួលសពយកទៅធ្វើបុណ្យតាមប្រពៃណី ៕ សំណាង