រាជធានីភ្នំពេញ ៖ ករណីគ្រោះថ្នាក់ចរាចរណ៍ម៉ូតូ២គ្រឿង បុកគ្នាពេញមួយទំហឹង ក្នុងទិសដៅបញ្ច្រាសគ្នា បណ្ដាលឲ្យស្លាប់បុរសម្នាក់យ៉ាងរន្ធត់ និង២នាក់ទៀតរងរបួសធ្ងន់ ត្រូវបានក្រុមគ្រូពេទ្យ យកទៅសង្គ្រោះបន្ទាន់ភ្លាមៗ កាលពីវេលាម៉ោង ៨យប់ថ្ងៃទី៣០ ខែតុលា ឆ្នាំ២០២១ នៅតាមបណ្ដោយផ្លូវឌួងងៀប ក្នុងភូមិទ្រា សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។

ប្រភពព័ត៌មានពីបងប្អូនប្រជាពលរដ្ឋ ដែលនៅទីតាំងចំណុចកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូម៉ាក Suzuki Smah មួយគ្រឿង ដែលពាក់ស្លាកលេខ ភ្នំពេញ 1AL-4707 ជិះក្នុងទិសដៅពីត្បូងទៅជើង លុះមកដល់ចំណុចកើតហេតុបានវ៉ារថយន្តមួយគ្រឿងយ៉ាងលឿន ភ្លាមនោះក៏បានទៅបុកគ្នាជាមួយនឹងម៉ូតូឌ្រីមសេ១២៥ មួយគ្រឿងទៀត ដែលពាក់ស្លាកលេខ ភ្នំពេញ 1IR-3099 ឌុបគ្នា២នាក់ បណ្ដាលឲ្យរងរបួសធ្ងន់ទាំង២នាក់។ ចំណែកឯម្ចាស់ម៉ូតូSuzuki Smah វិញបានស្លាប់បាត់បង់ជីវិត នៅនឹងកន្លែងតែម្តង។

ក្រោយពេលកើតហេតុ សមត្ថកិច្ចបានធ្វើការវាស់វែង យកម៉ូតូទាំង២គ្រឿង យកទៅទុកនៅអធិការដ្ឋាននគរបាលខណ្ឌមានជ័យ ដើម្បីដោះស្រាយគ្នានៅពេលក្រោយ។ ចំណែកឯសាកសពត្រូវបានសមត្ថកិច្ចប្រគល់អោយគ្រូពេទ្យដឹកយកទៅតម្កល់នៅវត្ត ដើម្បីរង់ចាំសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត ៕ Mrr Ka