រាជធានីភ្នំពេញ ៖ រថយន្ដចំនួន២គ្រឿង បានប្រឡះគ្នាពេញទំហឹង ចំណុចផ្លូវបែកជាបួន ខ្ទេចទាំងសងខាង បង្កការភ្ញាក់ផ្អើល កាលពីវេលាម៉ោង ១១ យប់ ថ្ងៃទី ៣០ ខែតុលា ឆ្នាំ២០២១ នៅតាមបណ្ដោយផ្លូវលេខ២១៤ កែងនឹងផ្លូវលេខ៥១ ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេបានឃើញរថយន្តម៉ាក Lexus 470 មួយគ្រឿង ដែលពាក់ ស្លាកលេខ ភ្នំពេញ 2G-2929 ធ្វើដំណើរតាមបណ្ដោយផ្លូវ៥១ ក្នុងទិសដៅពីត្បូងទៅជើង មកដល់ចំណុចកើតហេតុ ផ្លូវបំបែកជាបួន ក៏បានបុកគ្នាជាមួយនឹងរថយន្តម៉ាកហាយឡែនឌ័រ មួយគ្រឿងទៀត ដែលពាក់ស្លាកលេខ ភ្នំពេញ 2AE-9573 បណ្ដាលឲ្យដាច់កង់ និងដាច់ក្រឡេ រងការខូចខាតទាំងសង្ខាងយ៉ាងដំណំ តែសំណាងណាស់ គ្មាននរណាម្នាក់ រងរបួសនោះទេ ។

ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌដូនពេញ បានធ្វើការទំនាក់ទំនងឲ្យជំនាញចរាចរណ៍ផ្លូវគោករបស់ស្នងការដ្ឋាននគរបាលរាជធានីភ្នំពេញ ធ្វើការស្ទូចរថយន្ដទាំង២គ្រឿង យកទៅទុកនៅស្នងការដ្ឋាននគរបាលរាជធានីភ្នំពេញ ដើម្បីរង់ចាំភាគីសងខាងចូលមកដោះស្រាយគ្នាតាមផ្លូវច្បាប់បន្តទៀត ៕ Mrr Ka