រាជធានីភ្នំពេញ ៖ រថយន្ដស៊េរីទំនើបម៉ាក BMW មួយគ្រឿង បើកបរដោយតារាសម្តែងនិងចម្រៀង លោក អេឡិចចាន់ត្រា បានបុកគ្នាជាមួយនិងរថយន្ដដឹកប្រេងឥន្ធនៈចំពីក្រោយពេញទំហឹង បណ្តាលឲ្យវិលរថយន្តBMW មួយជុំ ខ្ទេចក្បាលខាងមុខយ៉ាងដំណំតែម្តង ចំណែកមនុស្សវិញ មិនមានរងរបួសអ្វីនោះទេ បង្កការភ្ញាក់ផ្អើលដល់សមត្ថកិច្ច ចុះមកធ្វើការពិនិត្យវាស់វែង កាលពីវេលាម៉ោង ៤យប់ ថ្ងៃទី៣១ ខែតុលា ឆ្នាំ២០២១ នៅតាមបណ្ដោយផ្លូវជាតិលេខ១ ក្នុងសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានពីប្រជាពលរដ្ឋ បានឲ្យដឹងថា គេបានឃើញរថយន្ត BMWស៊េរីទំនើបមួយគ្រឿង ពាក់ស្លាកលេខ ភ្នំពេញ 2BA- 3976 បើកបរដោយ បុរសម្នាក់ ដែលជា តារាសម្តែងនិងចម្រៀង លោក អេឡិចចាន់ត្រា លុះដល់ចំណុចកើតតហេតុ មិនដឹងជាយ៉ាងម៉េចនោះទេ ស្រាប់តែជ្រុលទៅបុកគូទរថយន្តដឹកប្រេងឥន្ធនៈ ដែលពាក់ស្លាក់លេខ ភ្នំពេញ 3D-2577 ចំពីក្រោយយ៉ាងពេញទំហឹង បណ្តាលអោយរថយន្ត BMW ស៊េរីទំនើបនោះ ខ្ទេចមួយកំណាត់ ខាងមុខយ៉ាងដំណំ វិលមួយជុំ ។ ចំណែកឯរថយន្តដឹកប្រេងឥន្ធនៈនោះវិញ រងការខូចខាតខាងក្រោយបន្តិចបន្តួចប៉ុណ្ណោះ តែសំណាងគ្មាននរណាម្នាក់ រងរបួសនោះឡើយ ។

ក្រោយពេលកើតហេតុសមត្ថកិច្ចមូលដ្ឋានក៏បានមកដល់ ដោយបានឲ្យភាគីទាំងសងខាង ធ្វើការដោះស្រាយចរចាគ្នា ដោយបញ្ចប់រឿង នៅទីតាំងចំណុចការហេតុភ្លាមៗតែម្តង៕ Mrr Ka