ខេត្តព្រះសីហនុ ៖ បុរសម្នាក់បានស្លាប់ភ្លាមៗ ក្រោយជិះម៉ូតូក្នុងល្បឿនលឿន ដល់ផ្លូវកោង ជ្រុលទៅបុកបង្កាន់ដៃស្ពាន បោកក្បាលស្លាប់ក្នុងថ្លុកឈាមនៅនិងកន្លែង កាលពីវេលាម៉ោង១២យប់ ថ្ងៃទី៣១ ខែតុលា ឆ្នាំ២០២១ លើស្ពានអូរត្រជាក់ចិត្ត ក្នុងភូមិ០៦ សង្កាត់លេខ០៤ ក្រុងព្រះសីហនុ ខេត្តព្រះសីហនុ។

ប្រភពព័ត៌មានពីបងប្អូនសាច់ញាតិបានប្រាប់ក្រុមការងារ TVFB ឲ្យដឹងថា សពជនរងគ្រោះដែលស្លាប់មានឈ្មោះ ហន វណ្ណណែម ភេទប្រុស អាយុ២១ឆ្នាំ រស់នៅក្រុងកោះរុង ។

តាមប្រភពដដែលបានបន្តទៀតថា បុរសដែលបានស្លាប់ កាលនៅរស់គាត់ធ្វើការនៅក្រុមទី៣១ ភូមិ០៣ សង្កាត់លេខ០៣ ខេត្តព្រះសីហនុ ហើយកាលពីក្បាលព្រលប់ បានជួបជុំគ្នាហូបចុកបន្តិចបន្តួច នៅតាមឆ្នេរ រួចក៏បាននាំគ្នាត្រឡប់ទៅផ្ទះប្អូន ហើយក៏បែកគ្នា មួយសន្ទុះក្រោយមក មានគេមកប្រាប់ថា មានម៉ូតូដួល ហើយក៏បានមកមើល ក៏ឃើញជនរងគ្រោះស្លាប់បាត់ទៅហើយ។

សមត្ថកិច្ចបានឲ្យដឹងថា ជុំវិញករណីគ្រោះថ្នាក់ចរាចរណ៍នេះ ម៉ូតូម៉ាក Yamaha R15 មួយគ្រឿង ពណ៌លឿងលាយខ្មៅ ពាក់ស្លាកលេខ តាកែវ 1P-2515 ធ្វើដំណើរតាមបណ្ដោយផ្លូវអូរត្រេះ ពីលិចទៅកើត ខណៈមកដល់ចំណុចស្ពាន អូរត្រជាក់ចិត្ត ផ្លូវកោង ដោយសារតែល្បឿនលឿនជ្រុល ជាន់ហ្វ្រាំងមិនទាន់ ជ្រុលទៅបុកឡើងឃឿន ធ្លាក់ពីលើម៉ូតូបោកក្បាលស្លាប់ភ្លាមៗ ចំណែកម៉ូតូប្លោង អូសជាង៥០ម៉ែត្រ។

ក្រោយពីកើតហេតុ សមត្ថកិច្ចចរាចរណ៍ផ្លូវគោកមកដល់បានវាស់វែង ហើយយកម៉ូតូទៅរក្សាទុកនៅការិយាល័យជំនាញ រង់ចាំសាច់ញាតិទៅទទួល ឯសាកសព ត្រូវបានរថយន្ដពេទ្យ យកទៅវត្ត ដើម្បីរង់ចាំសាច់ញាតិ មកទទួលយកធ្វើបុណ្យតាមប្រពៃណី ៕ សំណាង