ខេត្តព្រះសីហនុ ៖ ករណីគ្រោះថ្នាក់ចរាចរណ៍មួយបានកើតឡើង រវាងម៉ូតូ បុកជាមួយរថយន្ដ បណ្ដាលឲ្យស្រ្តី០២នាក់ រងរបួសធ្ងន់ស្រាល ត្រូវបានបញ្ជូនទៅកាន់មន្ទីរពេទ្យ កាលពីវេលាម៉ោង ១១និង៣០ នាទី យប់ថ្ងៃទី៣០ ខែតុលា ឆ្នាំ២០២១ នៅចំណុចចុងអារីស្តុនចាស់ ភូមិ០៤ សង្កាត់លេខ០៤ ក្រុងព្រះសីហនុ ខេត្តព្រះសីហនុ ។

ប្រភពប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញស្រ្តី០២នាក់ បានជិះម៉ូតូមួយគ្រឿង ម៉ាកហុងដា ពណ៌ខ្មៅ ពាក់ស្លាកលេខ តាកែវ 1M-2240 បានបើកតាមបណ្ដោយផ្លូវ១៤ មិថុនា ឆ្ពោះទៅអូរត្រេះ ស្រាប់តែមកដល់កន្លែងកើតហេតុ ក៏មានរថយន្ដមួយគ្រឿង បើកបរយ៉ាងលឿនម៉ាក TUNDRA ពណ៌ស ពាក់ស្លាកលេខ ភ្នំពេញ 2BE -6378 បើកបរដោយជនបរទេសម្នាក់ ដែលសមត្ថកិច្ចបញ្ជាក់ថា ជាជនជាតិចិន លុះដល់ចំណុចកើតហេតុ ម៉ូតូរបស់ស្ត្រីខាងលើ ក៏បានវ៉ាក់អើ កាច់ចង្កូតមិនទាន់ ជ្រុលទៅបុករថយន្ដចំកាងខាងក្រោយ បណ្ដាលឲ្យស្ត្រីអ្នកបើកបរ រងរបួសធ្ងន់ស្រាលតែម្ដង ខណៈមានអ្នកស្គាល់ស្ត្រីទាំង២នាក់ បាននិយាយថា ពួកគាត់ទើបតែមកពីធ្វើការរោងចក្រមុននេះ ក៏ជួបគ្រោះថ្នាក់បែបនេះតែម្តង ។

ក្រោយពីកើតហេតុ សមត្ថកិច្ចចរាចរណ៍ផ្លូវគោក បានមកដល់វាស់វែង រួចក៏បញ្ជូនជនរងគ្រោះទៅមន្ទីរពេទ្យដើម្បីសម្រាកព្យាបាល ខណៈសមត្ថកិច្ចបានឲ្យភាគីទាំង២ ដោះស្រាយគ្នាផងដែរ ដើម្បីបញ្ចប់រឿង ៕ សំណាង