រាជធានីភ្នំពេញ ៖ មានការភ្ញាក់ផ្អើលទាំងយប់ ខណៈនារីស្រស់ស្អាត២នាក់ បានជិះម៉ូតូតាមដងផ្លូវ ត្រូវបានក្រុមចោរ២នាក់ ធ្វើសកម្មភាពឆក់ទូរសព្ទម៉ាក iPhone 8 plus បានសម្រេចហើយព្យាយាមរត់ តែត្រូវនារីទាំង២នាក់ ដេញតាមផង ស្រែកចោរៗផង រហូតជនសង្ស័យភ័យផ្តួលម៉ូតូនាំគ្នារត់គេចខ្លួនបាត់ កាលពីវេលាម៉ោង១រំលងអាធ្រាត្រ ឈានចូលថ្ងៃទី៤ ខែវិច្ឆិកា ឆ្នាំ២០២១ នៅចំណុចរង្វង់មូលគួចកាណុង ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពព័ត៌មានពីនារីជនរងគ្រោះទាំង២នាក់ បានអោយដឹងថា មុនពេលកើតហេតុ ពួកខ្លួនបានជិះម៉ូតូមួយគ្រឿង ឌុបគ្នាមកពីហូបអីនៅវត្តភ្នំ ពេលជិះមកដល់រង្វង់មូលគួចកាណុង ក៏មានជនសង្ស័យ២នាក់ ជិះម៉ូតូសង់សេ១២៥ មួយគ្រឿង ដែលពាក់ស្លាកលេខ ភ្នំពេញ 1FL-9824 បានធ្វើសកម្មភាពឆក់ទូរសព្ទម៉ាក iPhone 8plus និងកាបូបលុយ ពីនារីជនរងគ្រោះបានសម្រេច ហើយបានជិះម៉ូតូរត់ តែត្រូវនារីជនរងគ្រោះទាំង២នាក់ ក្លាហាន ជិះម៉ូតូដេញតាមវិញ ស្រែកចោរៗ រហូតផ្អើលប្រជាពលរដ្ឋ ធ្វើឲ្យក្រុមជនសង្ស័យទាំងនោះភ័យ ក៏ផ្តួលម៉ូតូចោលហើយរត់បាត់តែម្តង សល់តែម៉ូតូប៉ុណ្ណោះ ត្រូវបានជនរងគ្រោះទាក់ទងទៅសមត្ថកិច្ច ដើម្បីឲ្យសមត្ថកិច្ចមកទទួលយកទៅរក្សាទុក និងបាននាំជនរងគ្រោះ ទៅប៉ុស្ដិ៍នគបាលសង្កាត់ស្រះចក ដើម្បីដាក់ពាក្យបណ្តឹង ស្វែងរកជនសង្ស័យនោះយកមកផ្តន្ទាទោសតាមច្បាប់ផងដែរ ៕ Mrr Tra