ខេត្តកណ្ដាល ៖ ពិតជារន្ធត់ សាកសពអ៊ុស្រីម្នាក់ ត្រូវបានរថយន្តកិនខ្ទេចម៉ត់មើលលែងយល់ ខណៈកំពុងជិះម៉ូតូតាមដងផ្លូវ ស្រាប់តែត្រូវរថយន្តយីធុប កង់១០ ដែលបើកលឿនដូចហោះ បុកពេញទំហឹង កិនអូសជាង៧០ម៉ែត្រឯណោះ ជាប់ទាំងមនុស្សទាំងម៉ូតូក្រោមរថយន្ត យ៉ាងសង្វេគបំផុត ទើបឈប់រថយន្ត ហើយត្រូវបានអ្នកភូមិនិងសមត្ថកិច្ច ឃាត់ខ្លួនតៃកុងរថយន្តនោះបានភ្លាមៗ កាលពីវេលាម៉ោង១០និង៥០នាទីព្រឹក ថ្ងៃទី៤ ខែវិច្ឆិកា ឆ្នាំ២០២១ លើផ្លូវ៣៨០ ស្ថិតភូមិឃ្លាំងមឿងជើង ឃុំព្រែកអំពិល ស្រុកខ្សាច់កណ្តាល ខេត្តកណ្តាល។

សមត្ថកិច្ចបានឲ្យដឹងថា សាកសពអ៊ុស្រីដែលស្លាប់មានឈ្មោះ ស្រេង ឡន ភេទ ស្រី អាយុ៦១ឆ្នាំ ជាអ្នកភូមិកើតហេតុខាងលើ ។ ចំណែកអ្នកបើកបររថយន្តបង្ក ឈ្មោះ កែវ សំណាង ភេទប្រុស អាយុ២៨ ឆ្នាំ រស់នៅភូមិស្ថាពរ ឃុំប៉ាលហា ស្រុកត្បែងមានជ័យ ខេត្តព្រះវិហារ ត្រូវបានឃាត់ខ្លួន។

ប្រភពព័ត៌មានពីបុរសម្នាក់ឈ្មោះ ស្រេង ឡន ដែលជាអ្នកឃើញហេតុការណ៍ផ្ទាល់ បានប្រាប់សមត្ថកិច្ចឲ្យដឹងថា មុនពេលកើតហេតុ គាត់បានឃើញ ម៉ូតូរបស់អ៊ុស្រីខាងលើ ម៉ាកគុបជ្រុង បើកបរឆ្លងផ្លូវ ពីកើតមកលិច ដល់ចំណែកផ្លូវខាងលិច ក៏ត្រូវរថយន្តម៉ាកស្កែន កង់ដប់ (យីឌុប) ពាក់ស្លាកលេខ កំពង់ចាម 3A -9778 ដឹកដី បើកមកលឿនដូចហោះ បុកម៉ូតូអ៊ុស្រីខាងលើពេញទំហឹង លាន់ដូចរន្ទះ រួចអូសជាប់ក្រោមរថយន្ត កិនអូស ចម្ងាយ ជាង៧០ម៉ែត្រឯណោះ ទើបឈប់ បណ្តាលឲ្យសពអ៊ុស្រីខ្ទេចម៉ត់ដូចប្រហិតទៅហើយ ចំណែកអ្នកបើកបររថយន្តត្រូវបានសមត្ថកិច្ចចាប់ខ្លួនបានភ្លាមៗផងដែរ ។

ក្រោយកើតហេតុ សមត្ថកិច្ចជំនាញ បានចុះមកធ្វើការវាស់វែង យករថយន្ត និងម៉ូតូជនរងគ្រោះ ទៅរក្សាទុក នៅការិយាល័យជំនាញ ដើម្បីរង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕