ខេត្តសៀមរាប ៖ ម៉ូតូមួយគ្រឿង បានឆេះយ៉ាងសន្ធោសន្ធៅ ខណៈមនុស្សវិញ គឺរងរបួសធ្ងន់ បន្ទាប់ពីជួបគ្រោះថ្នាក់ចរាចរណ៍ រវាងរថយន្ត បុកជាមួយនឹងម៉ូតូ ពេញទំហឹង កាលពីវេលាម៉ោង ១១យប់ ថ្ងៃទី៤ ខែវិច្ឆិកា ឆ្នាំ២០២១ ត្រង់ចំណុចមុខវត្តព្រហ្មចន្ទ័ ផ្លូវជាតិលេខ៦ ចន្លោះគីឡូម៉ែត្រលេខ២៨០ -២៨១ ក្នុងភូមិដំដែកថ្មី ឃុំដំដែក ស្រុកសូទ្រនិគម ខេត្ត សៀមរាប ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា មុនពេលកើតហេតុ ករណីគ្រោះថ្នាក់ចរាចរណ៍នេះ កើតឡើង រវាងម៉ូតូ មួយ គ្រឿងម៉ាកហុងដាពណ៌ខ្មៅ ពាក់ស្លាកលេខសៀមរាប 1AE -0347 អ្នកបើកបរអ្នកបើកបរឈ្មោះ សុខ ភារុន ប្រុស អាយុ ២២ ឆ្នាំ ស្នាក់នៅភូមិជ្រៃខាងជើង ឃុំកៀនសង្កែ ស្រុកសូទ្រនិគម ខេត្ត សៀមរាប បានបុកប៉ះជាមួយរថយន្តម៉ាកLEXUS ពណ៌ទឹកមាស ពាក់ស្លាកលេខភ្នំពេញ 2AG-1879 ដែលអ្នកបើករថយន្តនោះ បានគេចខ្លួនបាត់ ក្រោយពេលបុករួច បណ្តាលអោយឆេះម៉ូតូនៅកន្លែងកើតហេតុខ្ទេចទាំងស្រុង រីឯអ្នកជិះម៉ូតូនោះវិញ រងរបួសធ្ងន់ធ្ងរ ត្រូវបានបញ្ជូនទៅកាន់មន្ទីរពេទ្យ ហើយភ្លាមៗក៏មាន រថយន្តអគ្គិភ័យបស់អធិការដ្ឋាននគរបាលស្រុកសូទ្រនិគម មិនបានចេញទៅទេ ដោយយក ឧបករណ៍ បំពង់ពន្លត់អគ្គីភ័យទៅជួយពន្លត់ ទើបរលត់ ។

ក្រោយកើតហេតុ រថយន្តនិងម៉ូតូក៏ត្រូវបានសមត្ថកិច្ចយកទៅរក្សាទុក រង់ចាំដោះស្រាយគ្នាតាមច្បាប់បន្តទៀត ៕