រាជធានីភ្នំពេញ ៖ មានការភ្ញាក់ផ្អើលទាំងយប់ ខណៈអគ្គិភ័យមួយបានឆេះបង្គោលភ្លើង២ដើម យ៉ាងសន្ធោសន្ធៅ ផ្អើលប្រជាពលរដ្ឋ និងសមត្ថកិច្ចចុះមកធ្វើការអន្តរាគមន៍បាញ់ពន្លត់ កាលពីវេលាម៉ោង ជិត៩យប់ ថ្ងៃទី ៥ ខែវិច្ឆិកា ឆ្នាំ ២០២១ ម្តុំរង្វង់មូលទួលគោកចាស់ ផ្លូវ២៨៩ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ប្រភពពីពលរដ្ឋនៅកន្លែងកើតហេបានឲ្យដឹងថា ដំបូងឡើយគេឃើញមានការឆេះនៅលើបង្គោលភ្លើងមួយដើម ស្រាប់តែទុស្សេព្រៀកៗ បន្តឆេះឆ្លងដល់បង្គោលភ្លើងមួយដើមទៀតតែម្តង ខ្លាំងទៅៗ ទើបប្រជាពលរដ្ឋប្រញាប់រាយការណ៍ជូនសមត្ថកិច្ច ដើម្បីចុះមកបាញ់ពន្លត់ ហើយភ្លាមៗគេឃើញមានរថយន្តពន្លត់អគ្គិភ័យ ខាងបង្ការនិងសង្រ្គោះ បានចុះមកអន្តរាគមន៍ដល់ទីតាំងកើតហេតុចំនួន២គ្រឿង ទើបរលត់ទៅវិញជាស្ថាពរ មិនបណ្តាលឲ្យឆេះរាលដាលដល់ផ្ទះប្រជាពលរដ្ឋនោះឡើយ ៕ នុច