រាជធានីភ្នំពេញ ៖ រថយន្តឡង់គ្រីស័រ ស៊េរីទំនើប មួយគ្រឿង បើកបរដោយជនជាតិបរទេសម្នាក់ បានបុកម៉ូតូស្កុបពីពេញមួយទំហឹង បណ្ដាលឲ្យរងរបួសធ្ងន់ម្នាក់ ត្រូវបានបញ្ជូនទៅកាន់មន្ទីរពេទ្យ កាលពីវេលាម៉ោង២ យប់ឈានចូលថ្ងៃទី៨ ខែវិច្ឆិកា ឆ្នាំ២០២១ នៅតាមបណ្ដោយផ្លូវព្រះស៊ីសុវត្ថិ ក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេបានឃើញរថយន្តឡង់គ្រីស័រ ស៊េរីទំនើប ដែលពាក់ស្លាកលេខ ភ្នំពេញ 2BO-7007 បើកបរក្នុងទិសដៅពីជើងទៅត្បូង បើកបរដោយជនជាតិបរទេសម្នាក់ បានបុកម៉ូតូស្កុបពីដែលពាក់ស្លាកលេខ តាកែវ 1T-0477 បុកពេញមួយទំហឹង ក្នុងទិសដៅបញ្ច្រាសទិសគ្នា បណ្ដាលឲ្យរងរបួសធ្ងន់ម្នាក់ ត្រូវបានបញ្ជូនទៅមន្ទីរពេទ្យ ។

ក្រោយពេលកើតហេតុ សមត្ថកិច្ចក៏បានមកដល់ និងបានឃាត់ម្ចាស់រថយន្ត និងវាស់វែង យករថយន្តនិងម៉ូតូ យកទៅរក្សាទុកនៅស្នងការដ្ឋានចរាចរណ៍ផ្លូវគោក ដើម្បីរង់ចាំភាគីទាំងសង្ខាង ដោះស្រាយគ្នាតាមផ្លូវច្បាប់បន្តទៀត ៕ Mrr Ka