ខេត្តប៉ៃលិន ៖ មានករណីឃាតកម្មមួយបានកើតឡើង ដោយប្តីបានកាប់សម្លាប់ប្រពន្ធ រួចហើយចងកសម្លាប់ខ្លួននៅក្នុងបន្ទប់ទឹកតាមក្រោយ បណ្តាលឲ្យស្លាប់ទាំង២នាក់ បង្កការភ្ញាក់ផ្អើលកាលពីវេលាម៉ោងប្រហែល២០និង៤៥នាទី ថ្ងៃទី០៧ ខែវិច្ឆិកា ឆ្នាំ២០២១ នៅចំណុចរោងចាំចំការ ស្ថិតនៅភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ នេះបើយោងតាមផេក អគ្គស្នងការដ្ឋាននគរបាលជាតិ ។
សមត្ថកិច្ចបានឲ្យដឹងថា យោងតាមការបំភ្លឺរបស់ឈ្មោះ អូន សុខគា ភេទស្រី អាយុ១៦ឆ្នាំ មុខរបរកសិករ ត្រូវជាកូនបង្កើត បានឲ្យដឹងថា៖ ជនរងគ្រោះជាម្តាយមានឈ្មោះ ចាន់ គួយ អាយុ៥៧ឆ្នាំ មុខរបរកសិករ ទីលំនៅភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានស្លាប់នៅនឹងកន្លែងកើតហេតុ។ ចំណែកជនបង្កជាឪពុកមានឈ្មោះ ផាន់ ពៅ អាយុ៥២ឆ្នាំ មុខរបរកសិករ ទីលំនៅជាមួយគ្នា បានចងកធ្វើអត្តឃាតក្រោយពេលប្រព្រឹត្តល្មើស។
កូនស្រីជនរងគ្រោះបានឲ្យដឹងទៀតថា មុនពេលកើតហេតុគ្រួសាររបស់គាត់រស់នៅទីនោះមានសមាជិក០៣នាក់ (ឪពុក ម្តាយ កូន) នៅថ្ងៃកើតហេតុវេលាម៉ោងប្រហែល ៨និង៣០នាទីព្រឹក ពួកគាត់ទាំងពីរនាក់បានទៅផឹកស្រាបៀនៅផ្ទះឈ្មោះ រី មានគ្នាប្រហែល ០៤នាក់ ក្រោយពីផឹកស្រាបៀរអស់ប្រហែល ១កេស ពួកគាត់ក៏បន្ដទៅចូលរួម ខួបកំណើតគេដោយផឹកប្រហែល០២-០៣កំប៉ុងទៀត ដោយស្រវឹងរៀងខ្លួនក៏បានទាស់ពាក្យសំដីគ្នា បន្ដិចបន្តួច ហើយក៏នាំគ្នាត្រលប់មកផ្ទះវិញ ប៉ុន្តែឪពុកបានជិៈម៉ូតូមកតែម្នាក់ឯង ដោយទុកឱ្យម្តាយ និងខ្លួនដើរមកវិញ ពេលមកដល់ផ្ទះពួកគាត់ ក៏បានឈ្លោះប្រកែកគ្នាយ៉ាងខ្លាំង បន្ទាប់មកឪពុកក៏បានយកកាំបិតបង្គាក់កាប់ទៅលើម្តាយ ចំកផ្នែកខាងក្រោយ បណ្តាលឱ្យស្លាប់នៅនឹងកន្លែងកើតហេតុ រួចក៏បានប្រតាយប្រតប់ជាមួយខ្លួន ប៉ុន្តែខ្លួនក៏បានរើបម្រាស់រួចហើយក៏រត់ចូលក្នុងព្រៃ ក្រោយមកឪពុកក៏បានទៅចងកនៅក្នុងបន្ទប់ទឹកស្លាប់បាត់ទៅ ហើយខ្លួនក៏ដេកក្នុងព្រៃចំការមួយយប់ ពេលព្រឹកព្រលឹមក៏បានប្រាប់ទៅដល់អ្នករស់នៅក្បែរនោះឲ្យមកជួយមើល។
ក្រោយកើតហេតុ កម្លាំងប៉ុស្ដិ៍រដ្ឋបាលបានហ៊ុព័ទ្ធកន្លែងកើតហេតុរង់ចាំ នគរបាលជំនាញពិនិត្យ និងកោសល្យវិច្ច័យ និងប្រគល់ឲ្យសាច់ញាតិធ្វើបុណ្យតាមប្រពៃណី៕
