រាជធានីភ្នំពេញ ៖ លួចគេបានគ្រាន់ តែដល់ពេលគេទាន់ក្រែល! ជនសង្ស័យម្នាក់ ចូលទៅកាច់កម៉ូតូកង់បីគេបានសម្រេច តែស៊យម្ចាស់គេដឹងខ្លួនទាន់ ស្រែកឆោឡោផ្អើលដល់បងប្អូនប្រជាពលរដ្ឋ នាំគ្នាចេញពីផ្ទះស្ទាក់ចាប់ជាប់ វាយស្វាគមន៍ម្នាក់មួយដៃ មួយជើងសន្លប់ធំ ហូរឈាម។

ហេតុការណ៍នេះបានកើតឡើងនៅតាមបណ្ដោយផ្លូវបេតុងមួយកន្លែង ក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ វេលាម៉ោង៣ទៀបភ្លឺ ត្រូវនឹងថ្ងៃទី១២ ខែធ្នូ ឆ្នាំ២០២៣ ។

តាមប្រភពព័ត៌មានពីម្ចាស់កង់បី បានឲ្យដឹងថា មុនពេលកើតហេតុ គាត់បានទុកកង់បីនៅនឹងមុខផ្ទះ ហើយក៏ចូលក្នុងផ្ទះសម្រាក ។ ស្រាប់តែម៉ោង៣ ទៀបភ្លឺ ក៏មានជនសង្ស័យម្នាក់ បានធ្វើសកម្មភាពចូលទៅកាច់កម៉ូតូកង់បីរបស់គាត់ ដែលចតនៅមុខផ្ទះ គាត់ភ្ញាក់ដឹងខ្លួនទាន់ ឃើញជនសង្ស័យបណ្ដើរម៉ូតូគាត់ចេញ ក៏ស្រែកឆោឡោផ្អើលដល់បងប្អូនប្រជាពលរដ្ឋនិងដេញចាប់ ជនសង្ស័យនោះភ័យពេក ក៏ជិះបុកម្ចាស់កង់បី ហើយជ្រុលទៅបុកនឹងបង្គោលភ្លើង ក៏ត្រូវបានបងប្អូនប្រជាពលរដ្ឋ ចាប់បាន វាយស្វាគមន៍ម្នាក់មួយដៃ មួយជើងសន្លប់ធំ ហូរឈាម។

ក្រោយកើតហេតុសមត្ថកិច្ចបានមកដល់ នាំជនរងគ្រោះយកទៅប៉ុស្តិ៍ដើម្បីដាក់ពាក្យបណ្ដឹង និងនាំជនសង្ស័យយកទៅប៉ុស្តិ៍ដើម្បីធ្វើតាមនិតិវិធីច្បាប់ ៕ Mrr Ka