រាជធានីភ្នំពេញ៖ បុរសម្នាក់បានបើករថយន្តLEXUS LX470 យ៉ាងលឿនដូចហោះទៅបុករះរថយន្ដ៥គ្រឿង ,រុឺម៉កមួយគ្រឿង និងរទេសដឹកផ្លែឈើមួយគ្រឿងបណ្ដាលឲ្យរងការខូចខាត និងធ្វេីឲ្យមនុស្ស៤នាក់រងរបួសធ្ងន់ស្រាល ត្រូវបានរថយន្ដសង្គ្រោះបន្ទាន់ដឹកបញ្ជូនទៅមន្ទីពេទ្យភ្លាមៗ ។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១និង០០នាទី រសៀលថ្ងៃទី២៧ ខែវិច្ឆិកា ឆ្នាំ២០២៤. ស្ថិតនៅតាមបណ្តោយផ្លូវ១៨២ ជិតស្ដុប ទេពផន ភូមិ៤សង្កាត់ផ្សារដេប៉ូទី១ ខណ្ឌទួលគោក. រាជធានីភ្នំពេញ។

តាមប្រភពព័ត៍មាននៅកន្លែងកើតហេតុខាងលើបានឲ្យដឹងថា. មុនពេលកើតហេតុគេឃើញបុរសវ័យចំណាស់ម្នាក់បានបើករថយន្តបង្កម៉ាកឡិចសុីសLX470 ពណ៌ខ្មៅពាក់ផ្លាកលេខស្វាយរៀង 2A. 0788 បានបើកបរតាមបណ្ដោយផ្លូវ១៨២ ទិសដៅពីកើតទៅលិចក្នុងល្បឿនលឿន ខណៈដល់ផ្លូវបំបែកជាបួនកែងនិងផ្លូវ២៣៧ ក៏បុកម៉ូតូវ៉េវ ឲ្យដួល ហេីយបន្តបុករ៉ីម៉ក១គ្រឿង និងបន្ដបុករះរថយន្តក្នុងឃ្លាំងដែលម្ចាស់កំពុងតែដាក់តាំងលក់ក្នុងហាងរងការខូចខាតអស់ចំនួន៥គ្រឿង និងរទេស១គ្រឿងថែមទៀត បណ្ដាលឲ្យរងរបួសធ្ងន់ស្រាល៤នាក់ ខូចខាតរថយន្ដទាំង៥គ្រឿងហើយអ្នកបើកបររថយន្ដរងរបួសធ្ងន់ ភ្លាមៗជនរងគ្រោះត្រូវបានបញ្ជូនទៅសង្រ្គោះនៅឯមន្ទីរពេទ្យលោកសង្ឃ ចំណែករថយន្ដបង្ករងការខូចខាតយ៉ាងដំណំ ។

ក្រោយពេលកើតហេតុសមត្ថកិច្ចមូលដ្ឋានសហការណ៍ជាមួយកម្លាំងជំនាញនគរបាលចរាចរណ៍ខណ្ឌទួលគោក និងកម្លាំងជំនាញការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ បានចុះមកពិនិត្យកាំម៉ារ៉ាសុវត្ថិភាពនិងធ្វើការវាស់វែង. និងស្ទូចយករថយន្តបង្កខាងលើទៅរក្សាទុកដើម្បីដោះស្រាយគ្នាតាមផ្លូវច្បាប់នៅពេលក្រោយ៕