រថយន្តដឹកក្រណាត់រោងចក្រធុនធំ៨តោន បើកធ្លាក់ជង្ហុកក្រឡាប់ភីងផ្ងារជើងច្រង៉ាង
រាជធានីភ្នំពេញ ៖ រថយន្តដឹកទំនិញធុនធំមួយគ្រឿង បានផុងដី ផ្អៀងក្រឡាប់ផ្ងារជើងច្រង៉ាង បង្កការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ចចុះមកជួយសម្រួលចរាចរណ៍ កុំឲ្យមានការកកស្ទះ ។
ហេតុការណ៍នេះបានកើតឡើងនៅម៉ោង៥ល្ងាច ថ្ងៃទី១២ ខែធ្នូ ឆ្នាំ២០២៣ នៅចំណុចផ្លូវ២១៧ កែងផ្លូវបេតុងចូលសារៈមន្ទីរប្រល័យពូជសាសន៍ជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ។
សមត្ថកិច្ចបានឲ្យដឹងថា រថយន្តដែលក្រឡាប់នេះ ជារថយន្តម៉ាកហ៊ីយ៉ាន់ដាយ៨តោន ដឹកក្រណាត់ខោអាវរោងចក្រ បានបើកធ្លាក់ជង្ហុកផុង ក៏ផ្អៀងក្រឡាប់ភីងផ្ងារជើងតែម្តង សំណាងមិនចំអ្នកដំណើរណាម្នាក់រងរបួសនោះទេ គ្រាន់តែខូចខាតរថយន្ត និងបានឲ្យម្ចាស់ហៅរថយន្តស្ទូច មកស្ទូចយករថយន្តខាងលើ ទៅជុសជុលដោយខ្លួនឯង ដោយមាននគរបាលខណ្ឌដង្កោ និងនគរបាលប៉ុស្តិ៍ជើងឯក ជួយសម្រួលចរាចរណ៍ផងដែរ៕ អែល វិចិត្រ
