រាជធានីភ្នំពេញ ៖ បុរសម្នាក់ ជាជនបរទេស បានបើករថយន្ត Highlander ឆ្លងផ្លូវ ក៏ត្រូវបានរថយន្តព្រូស បុកពេញទំហឹង បណ្ដាលឲ្យក្រឡាប់រថយន្តព្រូសផ្ងារជើងឡើងលើ រងការខូចខាតទាំងសងខាង បង្កការភ្ញាក់ផ្អើល កាលពីវេលាម៉ោង ១យប់ ឈានចូលថ្ងៃទី១៤ ខែធ្នូ ឆ្នាំ២០២៣ នៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ចោមចៅទីមួយ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញបុរសម្នាក់ ដែលជាជនបរទេស បានបើករថយន្ត Highlander ដែលពាក់ស្លាកលេខ ភ្នំពេញ 2AL 6706 ឆ្លងផ្លូវ ពេលនោះក៏ត្រូវបានរថយន្តព្រូស ពណ៌ស ពាក់ស្លាកលេខ ភ្នំពេញ 2BC-2536 បុកពេញទំហឹង ផ្លោងរថយន្តព្រូស ក្រឡាប់ផ្ងារជើងឡើងលើតែម្តង រងការខូចខាតទាំងសងខាង ។
ក្រោយកើតហេតុសមត្ថកិច្ចក៏បានមកដល់ បានធ្វើការរបស់វែងយករថយន្តទាំង២គ្រឿងនេះ យកទៅរក្សាទុកនៅឯការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នាតាមនីតិវិធីច្បាប់ ៕ Mrr Ka
