រាជធានីភ្នំពេញ ៖ យុវជនចំនួន៣នាក់ បានរងរបួសធ្ងន់ធ្ងរណាស់ ខណៈកំពុងជិះម៉ូតូលឿន ស្របពេលរថយន្តស៊េរីទំនើបម៉ាក ឡិចស៊ីស Sport LX450 បត់ឆ្លងផ្លូវចូលតាមច្រកបុរីមួយកន្លែង ក៏បុកគ្នាពេញទំហឹង ហោះផ្លោងមនុស្សដូចសំឡី រណូករណែលក្នុងថ្លុកឈាម ត្រូវបានប្រជាពលរដ្ឋប្រញាប់តេទូរសព្ទទៅកាន់រថយន្តសង្គ្រោះ ចុះមកដឹកយកជនរងគ្រោះទាំង៣នាក់នេះ ទៅសង្គ្រោះបន្ទាន់នៅមន្ទីរពេទ្យ ដោយមិនទាន់ដឹង ស្ថានភាពទៅជាយ៉ាងណា យ៉ាងណីនោះទេ ។

ហេតុការណ៍នេះបានកើតគឡើងកាលពីវេលាម៉ោង ៤ល្ងាចថ្ងៃទី១៣ ខែធ្នូ ឆ្នាំ២០២៣ នៅចំណុចច្រកចូលបុរីមួយកន្លែង តាមបណ្តោយផ្លូវ៦០ម៉ែត្រ ក្នុងចាក់អង្រែក្រោម ខណ្ឌមានជ័យ រាជធានីភ្នំពេញ ។

តាមប្រភពព័ត៌មាន ពីកន្លែងកើតហេតុ បានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាង រថយន្តម៉ាកឡិចស៊ីស Sport LX450 ពណ៌ស ពាក់ស្លាកលេខ 2AN-8558 បើកបរដោយបុរសវ័យ៥០ឆ្នាំជាងម្នាក់ រួមដំណើរជាមួយមនុស្សស្រី២នាក់ទៀតក្នុងរថយន្ត បើកបរពីជើងមកត្បូង តាមបណ្តោយផ្លូវ៦០ម៉ែត្រ លុះមកដល់ចំណុចច្រកចូលបុរីមួយកន្លែង រថយន្តនេះក៏បានបត់ឆ្វេងឆ្លង គាប់ជួនម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ កណ្តាល 1Z-1855 ជិះដោយយុវជន៣នាក់ឌុបគ្នា ក្នុងទិសដៅបញ្ច្រាសទិសគ្នាជាមួយរថយន្ត ពីត្បូងមកជើងវិញ គេចមិនទាន់ ក៏បុកគ្នាលាន់ដូចរន្ទះ ខ្ទាតផ្លោងមនុស្សដូចសំឡី របួសធ្ងន់ទាំង៣នាក់ រណូករណែលក្នុងថ្លុកឈាម ចំណែករថយន្តនិងម៉ូតូរងការខូចខាតយ៉ាងដំណំ ។

ភ្លាមៗប្រជាពលរដ្ឋ បាននាំគ្នាប្រញាប់តេទូរសព្ទទៅកាន់រថយន្តសង្គ្រោះ ចុះមកដឹកយកជនរងគ្រោះទាំង៣នាក់នេះ ដោយ២នាក់ត្រូវបានបញ្ជូនតាមរថយន្តសាមុយរបស់មន្ទីរពេទ្យបង្អែកខណ្ឌច្បារអំពៅ យកទៅសង្គ្រោះ និងម្នាក់ទៀតដឹកតាមរថយន្តសាមុយរបស់មន្ទីរពេទ្យបង្អែកចាក់អង្រែ ដឹកយកទៅសង្គ្រោះបន្ទាន់ ដោយមិនទាន់ដឹង ស្ថានភាពទៅជាយ៉ាងណា យ៉ាងណីនោះទេ អត្តសញ្ញាណក៏មិនទាន់ស្គាល់ គ្រាន់តែដឹងថា ទាំង៣នាក់នេះ មានស្រុកកំណើតនៅស្រុកស្អាង ខេត្តកណ្តាល ។

ក្រោយកើតហេតុគេឃើញមាននគរបាលប៉ុស្តិ៍ចាក់អង្រែក្រោម រួមនិងនគរបាលជំនាញចរាចរណ៍ខណ្ឌមានជ័យ បានចុះមកធ្វើការវាស់វែង ប្រគល់ទាំងម៉ូតូនិងរថយន្តខាងលើនេះ យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយតាមច្បាប់បន្តទៀត ៕ អែល វិចិត្រ