រាជធានីភ្នំពេញ ៖ នារីម្នាក់បើករថយន្ត ឡិចស៊ីស RX350 បុកដើមឈើបណ្ដាលឲ្យក្រឡាប់ជាច្រើនជុំ រងការខូចខាតយ៉ាងដំណំ។
ហេតុការណ៍នេះ ស្ថិតតាមបណ្ដោយផ្លូវជាតិលេខ១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ វេលាម៉ោង១យប់ត្រូវថ្ងៃទី១៦ ខែមីនា ឆ្នាំ២០២៤។
តាមប្រភពព័ត៌មានពីបងប្អូនប្រជាពលរដ្ឋ និងពីសមត្ថកិច្ចមូលដ្ឋាន បានឲ្យដឹងថា មុនពេលកើតហេតុ គេបានឃើញនារីម្នាក់បើករថយន្ត ឡិចស៊ីស RX350 ពាក់ស្លាកលេខ ភ្នំពេញ 2AH-8977 បើកតាមបណ្ដោយផ្លូវជាតិលេខ៦ ក្នុងទិសដៅពីលិចមកកើត មកដល់កន្លែងកើតហេតុ រេចង្កូតទៅបុកដើមឈើ បណ្ដាលឲ្យក្រឡាប់ជាច្រើនជុំ រងការខូចខាតយ៉ាងដំណំ។ សំណាងល្អនារីខាងលើមិនមានគ្រោះថ្នាក់ដល់ជីវិត រួចគេចចេញពីកន្លែងកើតហេតុបាត់ ។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក នៃអធិការដ្ឋាននគរបាលខណ្ឌច្បារអំពៅ ធ្វើការវាស់វែង យករថយន្តទៅរក្សាទុក ដើម្បីរង់ចាំដោះស្រាយនៅពេលក្រោយ ៕ Mrr Ka
