រាជធានីភ្នំពេញ ៖ ស្ត្រីចំណាស់ម្នាក់ ត្រូវរថយន្ត កិនអូសដាច់ក្បាលចេញពីខ្លួនស្លាប់ភ្លាមៗ យ៉ាងរន្ធត់ ក្រោយឃើញជិះម៉ូតូមកពីក្រោយ ស្របទិសគ្នាជាមួយរថយន្ត។

គ្រោះថ្នាក់ចរាចរណ៍នេះបង្កភ្ញាក់ផ្អើលនាវេលាម៉ោង ០៥ល្ងាចថ្ងៃទី១៥ ខែមីនា ឆ្នាំ២០២៤ ស្ថិតនៅតាមបណ្តោយផ្លូវជាតិលេខ០១ ក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។

សមត្ថកិច្ចបានឲ្យដឹងថា ជនរងគ្រោះមានឈ្មោះ តាំង ប៉ឡេង អាយុ ៤៩ឆ្នាំ ភេទស្រី មានទីលំនៅ ផ្ទះលេខ១៥០កាអឺ០ ផ្លូវ ២១៥ ភូមិ០៨ សង្កាត់វាលវង់ ខណ្ឌ៧មករា រាជធានីភ្នំពេញ ។

តាមយោងតាមប្រភពព័ត៌មាន ពីពលរដ្ឋធ្វើដំណើរឆ្លងកាត់បានអោយដឹងថា មុនពេលកើតហេតុ គេបានឃើញស្រ្តីចំណាស់ម្នាក់ បើកបរម៉ូតូ ម៉ាកសង់ឌ្រីម ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ភ្នំពេញ 1CE-2520 បើកបរតាមបណ្តោយផ្លូវជាតិលេខ០១ ក្នុងគោលបំណងត្រឡប់ទៅផ្ទះវិញ នៅម្តុំបុរីកីឡា ខណៈមកដល់ចំណុចកើតហេតុ ស្រ្តីខាងលើ មិនដឹងយ៉ាងម៉េច ក៏ត្រូវរថយន្តក្រឡុកស៊ីម៉ងត៍ មួយគ្រឿង ពាក់ស្លាកលេខ ភ្នំពេញ 5A-3202 ដែលបើកស្របគ្នា កិនក្បាលស្លាប់ភ្លាមៗ នៅនឹងកន្លែង ។ ចំណែកអ្នកបើករថយន្តបង្ក មានការភ័យតក់ស្លុតខ្លាំងពេក បានចុះពីរថយន្ត រួចរត់ចូលទៅក្នុងប៉ុស្តិ៍នគរបាលរដ្ឋច្បារអំពៅទី០២ ដើម្បីការពារខ្លួនខ្លាចមានការផ្ទុះហិង្សាពីប្រជាពលរដ្ឋ​ ។

ក្រោយពេលកើតហេតុ សមត្ថកិច្ចមូលដ្ឋានបានចុះមកជួយសម្រួលចរាចរណ៍ រួចបន្តទាក់ទងទៅមន្រ្តីជំនាញចរាចរណ៍ក្រុង ដើម្បីមកវាស់វែងយករថយន្ត និងម៉ូតូទៅរក្សាទុករងចាំដោះស្រាយតាមពេលក្រោយ។ ចំណែកឯសាកសពត្រូវបានសមត្ថកិច្ច ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ អែល មេសា