រាជធានីភ្នំពេញ ៖ យុវជនម្នាក់ បានជិះម៉ូតូបុកទ្រូងផ្លូវ បណ្តាលឲ្យស្លាប់យ៉ាងអាណោចអាធ័ម ។

ហេតុការណ៍នេះបានកើតឡើងកាលពីវេលាម៉ោង ៤:៣០នាទី ថ្ងៃទី ១៦ ខែ មីនា ឆ្នាំ២០២៣លើផ្លូវ២៧១ ភូមិសន្សំកុសល សង្កាត់បឹងទំពុន១ ខណ្ឌមានជ័យ រាជធានីភ្នំពេញ។

តាមរបាយការណ៍ពីសមត្ថកិច្ចបានឲ្យដឹងថា ករណីនេះ បានកើតឡើង ដោយម៉ូតូមួយគ្រឿងម៉ាក Dream125 ពណ៌ខ្មៅ ផ្លាកលេខ កំពង់ឆ្នាំង 1M 4769 បើកបរដោយមិនស្គាល់ឈ្មោះ ភេទប្រុស មិនស្គាល់អាស័យដ្ឋាន ក្នុងទិសដៅពីជើងទៅត្បូង លុះដល់ចំណុចកើតហេតុ អ្នកបើកម៉ូតូខ្វះការប្រុងប្រយត្ន័ រេចង្កូតបុកទ្រូងផ្លូវ បណ្តាលឲ្យស្លាប់ភ្លាមៗនៅទីតាំងកើតហេតុតែម្តង ។

សមត្ថកិច្ចបានបញ្ជាក់ថា ក្រោយពីស្រាវជ្រាវ លឺថាជនរងគ្រោះជាអ្នករស់នៅខេត្តកំពង់ឆ្នាំង ហើយភ្លាមៗដោយពុំទាន់មានគ្រួសារមកទទួលសព សមត្ថកិច្ចក៏បានដឹកសាកសព យកទៅតម្កល់នៅវត្តទឹកថ្លា រង់ចាំសាច់ញាតិមកទទួល ខណៈម៉ូតូខូចធ្ងន់មួយគ្រឿង ត្រូវបានសមត្ថកិច្ចវាស់វែងយកទៅរក្សាទុកនៅអធិការដ្ឋាននគរបាលខណ្ឌមានជ័យ ៕ អែល វិចិត្រ