រាជធានីភ្នំពេញ ៖ យុវជនម្នាក់ បានទុកម៉ូតូចូលទិញអីញ៉ាំមួយភ្លែត ត្រូវបានក្រុមចោរមួយក្រុម លួចបានសម្រេច ជិះចេញ តែត្រូវបានម្ចាស់ម៉ូតូមើលតាម GPS ដេញតាមសញ្ញាទីតាំង រហូតរកឃើញម៉ូតូមកវិញ។

ហេតុការណ៍នេះ បានកើតឡើងនៅក្នុងភូមិបឹងឈូក ស្ថិតនៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ វេលាម៉ោង៣ទាបភ្លឺ ត្រូវនឹងថ្ងៃទី២៣ ខែមីនា ឆ្នាំ ២០២៤ ។

តាមប្រភពព័ត៌មានពីជនរងគ្រោះ ដែលជាម្ចាស់ម៉ូតូបានឲ្យដឹងថា មុនពេលកើតហេតុ គាត់បានជិះម៉ូតូ Dream c125 មួយគ្រឿង បានចតចោល ចូលទៅទិញអីញ៉ាំ ស្រាប់តែក៏លេចមុខជនសង្ស័យដែលជាក្រុមចោរចំនួន០៤នាក់ ចូលមកធ្វើសកម្មភាពលួចកាច់សោកម៉ូតូ បានសម្រេច ជិះរត់គេចពីម្ដុំវត្តក្រពើហារ ក្នុងសង្កាត់ព្រៃស ខណ្ឌដង្កោ តែត្រូវបានម្ចាស់ម៉ូតូមើលតាម GPS ដេញតាមសញ្ញាទីតាំង ក៏ឃើញក្រុមចោរទាំងនោះជិះម៉ូតូទៅដល់ព្រែកប្រា ខណ្ឌច្បារអំពៅ ទើបនាំគ្នាជិះដេញតាម រត់ពីខណ្ឌមួយ ចូលខណ្ឌមួយ មកដល់ចំណុចកើតហេតុ ក្នុងភូមិបឹងឈូក សង្កាត់ទឹកថ្លា ខណ្ឌសែនសុខ ក៏អស់សាំង ភ្លាមនោះក្រុមចោរទាំងនោះក៏បានផ្ដួលម៉ូតូចោល រួចនាំគ្នារត់គេចខ្លួនបាត់ពីកន្លែងកើតហេតុតែម្តង។

ក្រោយពេលកើតហេតុ ជនរងគ្រោះក៏បានទំនាក់ទំនងឲ្យសមត្ថកិច្ចប៉ុស្តិ៍ទឹកថ្លា មកមើលនៅទីតាំងចំណុចកើតហេតុ និងបានយកម៉ូតូទៅរក្សាទុក នៅប៉ុស្តិ៍រង់ចាំជនរងគ្រោះ ដែលជាម្ចាស់ម៉ូតូ យកឯកសារម៉ូតូមកផ្ទៀងផ្ទាត់ រួចប្រគល់ជូនវិញ ៕ Mrr Ka