រាជធានីភ្នំពេញ៖ យុវជនម្នាក់ ចេញពីខេត្ត មកភ្នំពេញមកធ្វើការនៅហាងកាហ្វេមួយកន្លែង ចតម៉ូតូរបស់ខ្លួននៅមុខហាង ស្រាប់តែត្រូវបានជនសង្ស័យលួចកាច់.កម៉ូតូនោះ យករត់គេចខ្លួនបាត់ស្រមោល ។
ហេតុការណ៍នេះបានកើតឡើងនៅចំណុចហាងកាហ្វេជាប់វិទ្យាល័យ ផ្សារដើមថ្កូវ ក្បែរនឹងប៉ុស្តិ៍រដ្ឋបាលសង្កាត់ផ្សារដើមថ្កូវជាង១០០ម៉ែត្រ ផ្ទះលេខ១៩៨ ផ្លូវលេខ១៦៣ ភូមិ៣ សង្កាត់ផ្សាដើមថ្កូវ ខណ្ឌចំការមន រាជធានីភ្នំពេញ វេលាម៉ោង១២និង១០នាទីរសៀលថ្ងៃទី១ ខែមេសា ឆ្នាំ២០២៥ ។
តាមពាក្យបណ្តឹងរបស់ជនរងគ្រោះឈ្មោះ ជា ចិត្រា ភេទប្រុស អាយុ ១៧ឆ្នាំ ស្នាក់នៅក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ បានឲ្យដឹងថា មុនពេលកើតហេតុ ខ្លួនបានជិះម៉ូតូម៉ាក ហុងដាសេ១២៥ ពណ៌ខ្មៅ ស៊េរីឆ្នាំ២០២៥ ពាក់ផ្លាកលេខ ភ្នំពេញ 1LB-1905 តែម្នាក់ឯងចេញពីផ្ទះជួល ឆ្ពោះមកហាងកាហ្វេនៅចំណុចកើតហេតុ ដោយបានដាក់ម៉ូតូនៅលើចិញ្ចើមផ្លូវ រួចក៏ដើរចូលទៅក្នុងហាងកាហ្វេធ្វើការធម្មតា លុះដល់ម៉ោងកើតហេតុ គាត់ចេញមកយកម៉ូតូ ស្រាប់តែបាត់ម៉ូតូតែម្តង ជនរងគ្រោះបានព្យាយាមដើររកដែរ តែរកមិនឃើញនោះទេ ក៏មកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ផ្សារដើមថ្កូវ ដើម្បីឲ្យសមត្ថកិច្ចជួយធ្វើការស្រាវជ្រាវ តាមចាប់ជនសង្ស័យខាងលើយកមកផ្តន្ទាទោសតាមច្បាប់ និងស្វែងរកម៉ូតូរបស់ខ្លួនត្រឡប់មកវិញ ព្រោះចេញពីស្រុកមក មកធ្វើការនៅភ្នំពេញមានតែម៉ូតូមួយគ្រឿងនេះតែប៉ុណ្ណោះសម្រាប់ជិះទៅធ្វើការ ដើម្បីរកប្រាក់ចិញ្ចឹមជីវិត ៕ នុច
