រាជធានីភ្នំពេញ ៖ រថយន្តដឹកឈើមួយគ្រឿង មិនដឹងជាបើកក្នុងល្បឿនប៉ុន្មាននោះទេ បានបុកជាមួយរថយន្តម៉ាកឡិចស៊ីស ៥៧០ ដែលធ្វើដំណើរទៅឆេងម៉េងជាលក្ខណៈគ្រួសារ ពេញទំហឹង ខ្ទេចរថយន្តយ៉ាងដំណំ រួចហើយរថយន្តដឹកឈើនេះ ជ្រុលទៅបុកធ្លាយរបងឃ្លាំងមួយកន្លែងថែមទៀត។
ហេតុការណ៍នេះបានកើតឡើងកាលពីវេលាម៉ោង៤ទៀបភ្លឺថ្ងៃទី៤ ខែមេសា ឆ្នាំ២០២៥ ស្ថិតនៅលើកំណាត់ផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញ រថយន្ត LEXUS 570 ពណ៌ខ្មៅមួយគ្រឿង ពាក់ស្លាកលេខ ភ្នំពេញ 2N-1899 ធ្វើដំណើរទៅឆេងម៉េងជាលក្ខណៈគ្រួសារ តាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុ ស្រាប់តែមានរថយន្តកូរ៉េដឹកឈើ ពណ៌ខៀវ ម៉ាក HYUNDAI ពាក់ស្លាកលេខ ភ្នំពេញ 2O-7405 បើកបរក្នុងទិសដៅបញ្ច្រាសទិសគ្នារេចង្កូតបុកឡើងខឿនសួនច្បារចែកទ្រូងផ្លូវ ពីម្ខាងទៅម្ខាងមកបុករថយន្ត Lexus យ៉ាងពេញទំហឹង រួចជ្រុលទៅបុកធ្លាយរបងឃ្លាំងមួយកន្លែងថែមទៀតទើបអស់ល្បឿនទៅមុខលែងរួច សំណាងល្អក្នុងហេតុការណ៍គ្មាននរណាម្នាក់ រងរបួសអ្វីនោះទេ។
ក្រោយកើតហេតុ សមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង យករថយន្តទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕
