ខេត្តបាត់ដំបង៖ បុរស២នាក់ជិះម៉ូតូឌុបគ្នា ទៅបុកពីក្រោយរថយន្តម៉ាកហ៊ីយ៉ាន់ដាយ ពេញទំហឹង គាបម៉ូតូជាប់នឹងកង់រថយន្ត ស្លាប់ម្នាក់យ៉ាងរន្ធត់ ចំណែកម្នាក់ទៀតរបួសធ្ងន់ ។ នេះបើយោងតាមផេកផ្លូវការរបស់ អគ្គស្នងការដ្ឋាននគរបាលជាតិ ។

ហេតុការណ៍នេះបានកើតឡើងកាលពីវេលាម៉ោង ២២និង២០នាទី ថ្ងៃទី០១ ខែមេសា ឆ្នាំ២០២៥ នៅផ្លូវជាតិលេខ៥ ចន្លោះគីឡូម៉ែត្រ២៥៩/២៦០ ក្រុមទី៦ ភូមិសាលាត្រាវ ឃុំកំពង់ព្រៀង ស្រុកសង្កែ ខេត្តបាត់ដំបង ។

លោកវរសេនីយ៍ទោ យុត តុងហូ អធិការនគរបាលស្រុកសង្កែ បានរាយការណ៍ឲ្យដឹងថា ៖ គ្រោះថ្នាក់ចរាចរណ៍នេះ មានម៉ូតូម៉ាក HONDA CLICK ពណ៍ស គ្មានស្លាកលេខ បើកបរដោយឈ្មោះ វ៉េត វ៉ាយ ភេទប្រុស អាយុ២២ឆ្នាំ រស់នៅភូមិថ្មី ឃុំព្រៃតូច ស្រុកមោងឫស្សី ខេត្តបាត់ដំបង (ស្លាប់នៅហ្នឹងកន្លែងកើតហេតុ) និងអ្នករួមដំណើរឈ្មោះ ឃឿន វុធ ភេទប្រុស អាយុ២៦ឆ្នាំ រស់នៅភូមិសាលាត្រាវ ឃុំកំពង់ព្រៀង ស្រុកសង្កែ ខេត្តបាត់ដំបង (រងរបួសធ្ងន់) បានបុកនិងរថយន្តម៉ាកហ៊ីយ៉ាន់ដាយ ពណ៍ស ធុនធ្ងន់ ពាក់ស្លាកលេខ PP-0135 ចង្កូតស្ដាំ អ្នកបើកបរមិនស្គាល់អត្តសញ្ញាណ បានគេចខ្លួនពីរកន្លែងកើតហេតុ ។

តាមការពិនិត្យកន្លែងកើតហេតុ កម្លាំងនគរបាលជំនាញ នៃអធិការដ្ឋាននគរបាលស្រុកសង្កែ បានបញ្ជាក់ដឹងថា៖ គ្រោះថ្នាក់ចរាចរណ៍នេះ ម៉ូតូបើកបរពីជើងទៅត្បូង បានឡើងវ៉ាជែងមិនប្រយ័ត្នបានរ៉េចង្កូត ទៅបុកពីក្រោយរថយន្ត ពេញទំហឹងតែម្ដង ។

បច្ចុប្បន្ន សមត្ថកិច្ចបានយកមធ្យោបាយបង្ក និងវត្ថុតាងយកទៅរក្សាទុកនៅការិយាល័យចរាចរណ៍ខេត្ត ដើម្បីដោះស្រាយតាមនីតីវិធីច្បាប់ ។ ចំណែកឯសាកសពជនរងគ្រោះ សមត្ថកិច្ចបានធ្វើកំណត់ហេតុ និងប្រគល់ទៅក្រុមគ្រួសារសាច់ញាតិយកទៅធ្វើបុណ្យតាមប្រពៃណី៕