រាជធានីភ្នំពេញ៖ ស្ត្រីម្នាក់ជិះម៉ូតូយកកាហ្វេទៅឲ្យភ្ញៀវ ឆ្លងផ្លូវ ត្រូវបានម៉ូតូស្ព័រ បុកចំពាក់កណ្តាលម៉ូតូរបស់នាង ស្លាប់ក្នុងថ្លុកឈាមយ៉ាងរន្ធត់ទាំងព្រឹកព្រលឹម វេលាម៉ោង ៦ និង៣០នាទី ថ្ងៃទី២០ ខែឧសភា ឆ្នាំ២០២១ តាមបណ្ដោយផ្លូវព្រះមុនីវង្ស ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

សាច់ញាតិ របស់សពបានប្រាប់ក្រុមការងារ TVFB បញ្ជាក់ថា ជនរងគ្រោះដែលស្លាប់នេះ មានឈ្មោះ ទ្រី ស្រីលីន អាយុ២៥ឆ្នាំ ជាអ្នកលក់កាហ្វេ ស្នាក់នៅម្តុំឫស្សីកែវ ហើយគាត់តែតែងជិះម៉ូតូយកកាហ្វេទៅឲ្យម៉ូយដែលកម្ម៉ុងជាប្រចាំ ។

តាមប្រភពព័ត៌មានពីប្រជាពលរដ្ឋនៅទីតាំងកើតហេតុបញ្ជាក់ថា មុនពេលកើតហេតុ គេឃើញ ស្ត្រីរងគ្រោះជិះម៉ូតូម៉ាក ស្កុបពី ពណ៌ស ពាក់ស្លាកលេខ ភ្នំពេញ 1GQ-2244 យកកាហ្វេទៅឲ្យភ្ញៀវនៅម្តុំមន្ទីរពេទ្យជប៉ុន លុះដល់ចំណុចកើតហេតុ ក៏បានឆ្លងផ្លូវ ស្រាប់តែត្រូវបុរសម្នាក់ បើកម៉ូតូស្ព័រធុនធំ ម៉ាកកាវ៉ាសាគី Z1000 ពណ៌បៃតង ពាក់ស្លាកលេខ ភ្នំពេញ 1HW-0909 ជិះពីជើងទៅត្បូង ក្នុងល្បឿនលឿន បុកម៉ូតូស្កុបពី ចំពាក់កណ្ដាលម៉ូតូពេញទំហឹង បណ្ដាលឲ្យជនរងគ្រោះដួលបោកក្បាលនឹងថ្នល់ ស្លាប់ភ្លាមៗក្នុងថ្លុកឈាមមួយរំពេច ទុកឲ្យម្តាយយំសោកបោកខ្លួនយ៉ាងខ្លាំង អាលោះអាល័យកូនស្រីជាទីស្រឡាញ់ មិនគួរណាកូនស្លាប់ចោលម្តាយឡើយ ស្របពេលដែលបើកបរម៉ូតូធំ ក៏ត្រូវបានសមត្ថកិច្ចធ្វើការឃាត់ខ្លួនបានភ្លាមៗផងដែរ ។

បន្ទាប់ពីកើតហេតុ គេឃើញសមត្ថកិច្ចចរាចរណ៍មូលដ្ឋាន សហការជាមួយសមត្ថកិច្ចចរាចរណ៍ក្រុង បានចុះធ្វើការវាស់វែង យកម៉ូតូទាំង២គ្រឿង ទៅរក្សាទុកនៅ ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាពេលកើតហេតុតាមច្បាប់ និងប្រគល់សាកសពជូនសាច់ញាតិយកទៅធ្វើបុណ្យតាមប្រពៃណី៕