រាជធានីភ្នំពេញ៖ យ៉ាងហោចណាស់ ម៉ូតូ២គ្រឿងបានរងការខូចខាត ខណៈរថយន្តមួយគ្រឿងទៀតក៏រងការខូចខាតដូចគ្នា តែមិនចង់មានរឿងវែងឆ្ងាយ ក៏បើកចេញទៅបាត់ ក្រោយត្រូវរម៉កដឹកទឹកសុទ្ធមួយគ្រឿង បើកចុះពីចំណោតផ្លូវទួល បុករះពេញទំហឹង បង្កការភ្ញាក់ផ្អើលកាលពីវេលាម៉ោង ២ និង១៥នាទីរសៀល ថ្ងៃទី២២ ខែឧសភា ឆ្នាំ២០២១ នៅចំណុចផ្លូវបេតុង ចុះពីក្លោងទ្វារវត្តដំបូកខ្ពស់ ស្ថិតក្នុងសង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ។

បើតាមសម្តីរបស់ប្រជាពលរដ្ឋ ដែលនៅទីតាំងកើតហេតុផ្ទាល់បានបញ្ជាក់ប្រាប់ក្រុមការងារ TVFB ឲ្យដឹងថា មុនពេលកើតហេតុ គេបានឃើញម៉ូតូសណ្តោងរម៉កដឹកទឹកសុទ្ធមួយគ្រឿង បានបើកចុះពីលើចំណោតផ្លូវទួល ពេលនោះសង្ស័យដឹកធ្ងន់ពេក ហ្វ្រាំងមិនស៊ី ស្របពេលវ៉ាក់ជាមួយនឹងរថយន្តមួយគ្រឿង ម៉ាកឡិចស៊ីសពណ៌ស មួយគ្រឿងបានបើកចេញពីផ្លូវបេតុងមួយទៀត ទើបជ្រុលទៅបុកចំចំហៀងទ្វារខាងមុខ បណ្តាលឲ្យរងការខូចខាត រួចបន្តបុកម៉ូតូ២គ្រឿងទៀត បណ្តាលឲ្យដួលបោករងការខូចខាតដូចគ្នា តែសំណាងករណីនេះមិនមាននណារម្នាក់រងរបួសធ្ងន់ធ្ងរអ្វីនោះឡើយ ។

បន្ទាប់ពីកើតហេតុ ដោយសារមិនចង់មានរឿងវែងឆ្ងាយ ភាគីរថយន្តឡិចស៊ីស ពណ៌ស មិនទាមទារសំណង ក៏បើកចេញទៅបាត់ នៅសល់តែរម៉កដឹកទឹកសុទ្ធ និងម៉ូតូ២គ្រឿង ដែលរងការខូចខាត នៅចរចារគ្នាដោះស្រាយនៅទីតាំងកើតហេតុ ដើម្បីបញ្ចប់រឿងផងដែរ ៕