ខេត្តបន្ទាយមានជ័យ៖ ជនសង្ស័យម្នាក់ ធ្វើសកម្មភាពលួចកាច់សោកម៉ូតូបាន១គ្រឿង បានសម្រេច ឲ្យមិត្តភក្តិយកទៅបញ្ចាំបានលុយ៦ម៉ឺនរៀល ត្រូវបានចាប់ខ្លួនបញ្ជូន ទៅសាលាដំបូងខេត្តបន្ទាយមានជ័យ ចាត់ការតាមច្បាប់ នៅថ្ងៃទី២៣ ខែឧសភា ឆ្នាំ២០២១។

លោកវរៈសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត បានប្រាប់ថា៖ ជនសង្ស័យត្រូវឃាត់ខ្លួនមានឈ្មោះ កែវ ពិសិដ្ឋ ភេទប្រុស អាយុ២១ឆ្នាំ រស់នៅភូមិក្បាលស្ពានមួយ សង្កាត់ប៉ោយប៉ែត ក្រុងប៉ោយប៉ែត។

លោកបានបញ្ជាក់ថា៖ នៅពេលឃាត់ខ្លួន ជនសង្ស័យកម្លាំងកងរាជអាវុធហត្ថក្រុងប៉ោយប៉ែត បានទទួលពាក្យបណ្តឹងឈ្មោះ ឡុក អ៊ុ ភេទប្រុស អាយុ៥៦ឆ្នាំ រស់នោភូមិជាមួយគ្នា បានប្តឹងជនសង្ស័យធ្វើសកម្មភាពលួចកាច់សោកម៉ូតូម៉ាកហុងដា Zoomer-X ១គ្រឿង ពាក់ផ្លាកលេខ បន្ទាយមានជ័យ 1P.6454 ដែលធ្វើសកម្មភាពលួចកាលពីថ្ងៃទី១៩ ខែឧសភា ឆ្នាំ២០២១ នៅចំណុចផ្សារយួន ភូមិក្បាលស្ពានមួយ សង្កាត់.ក្រុងប៉ោយប៉ែត។

លោកវរៈសេនីយ៍ត្រី នួន នីណារ៉ូ បានបញ្ជាក់ទៀតថា៖ ក្រោយទទួលពាក្យបណ្តឹងកម្លាំងជំនាញបានស្រាវជ្រាវ និងកំណត់មុខសញ្ញា ឃាត់ខ្លួនជនសង្ស័យម្នាក់ កាលពីថ្ងៃទី២១ ខែឧសភា ឆ្នាំ២០២១​នៅចំណុចភូមិក្បាលស្ពានមួយ សង្កាត់.ក្រុងប៉ោយប៉ែត ដើម្បីនាំយកមកសាកសួរ ។

តាមចម្លើយសារភាពម៉ូតូពិតជាបានធ្វើសកម្មភាពលួចពិតប្រាកដ ។ ក្រោយពេលលួចបានហើយអោយបក្ខពួកឈ្មោះ ស្វិត យកទៅបញ្ចាំឃើញយកលុយមកឲ្យចំនួន៦ម៉ឺនរៀល តែមិនដឹងយកទៅកន្លែងណា ពេលនេះឈ្មោះវិតកំពុងគេចខ្លួន ហើយកម្លាំងស្រាវជ្រាវចាប់ខ្លួនបន្តដើម្បីចាត់ការតាមច្បាប់៕ ដោយ៖ចិន្ត្រា