រាជធានីភ្នំពេញ ៖ រថយន្តចំនួន២គ្រឿង ១គ្រឿងបើកបរដោយបុរសជនបរទេស និងមួយគ្រឿងទៀតបើកបរដោយបុរសជនជាតិខ្មែរ មកដល់ចំណុចផ្លូវបែកជា៤ គ្មានរថយន្តណាមួយបង្អន់ល្បឿននោះទេ បានជ្រុលទៅបុកគ្នាពេញទំហឹង បណ្តាលឲ្យខ្ទេចរថយន្តទាំងខាងសងយ៉ាងដំណំ កណ្តាលផ្លូវ កាលពីវេលាម៉ោង ៣ និង៤៥នាទីរសៀល ថ្ងៃទី២៤ ខែឧសភា ឆ្នាំ២០២១ នៅចំណុចផ្លូវលេខ១៥៩ កែងនឹងផ្លូវលេខ ៥២ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

បើតាមប្រភពព័ត៌មានពីបងប្អូនប្រជាពលរដ្ឋនៅទីតាំងកើតហេតុ បានប្រាប់ក្រុមការងារTVFB ឲ្យដឹងថា មុនពេលកើតហេតុគេឃើញរថយន្តម៉ាកស៊ាំយ៉ុង ពណ៌ស ពាក់ស្លាកលេខ ភ្នំពេញ 2AP-2658 បើកបរដោយជនបរទេស សង្ស័យជាជនជាតិកូរ៉េ ក្នុងទិសដៅពីលិចមកកើត តាមបណ្តោយផ្លូវ៨២ ។ ចំណែករថយន្តមួយគ្រឿងទៀតម៉ាក ព្រុស ពណ៌ក្រហម ពាក់ស្លាកលេខ ភ្នំពេញ 2BD-5587 បើកបរដោយបុរសជនជាតិខ្មែរ ក្នុងទិសដៅពីត្បូងទៅជើង តាមបណ្តោយផ្លូវ១៥៩ ។ លុះដល់ចំណុចកើតហេតុ គេឃើញរថយន្តទាំង២គ្រឿង មិនបានបង្អន់ល្បឿនឡើយ ពោលគឺលឿនដូចគ្នា ហើយបុកគ្នាពេញទំហឹង លាន់ដូចរន្ទះ បណ្តាលឲ្យខ្ទាតចេញពីគ្នា រងការខូចខាត ផ្នែកខាងមុខយ៉ាងដំណំទាំង២គ្រឿង តែចាត់ទុកថាសំណាងណាស់ ក្នុងករណីនេះគ្មាននណរម្នាក់ រងរបួសនោះឡើយ ។

បន្ទាប់ពីកើតហេតុ គេឃើញសមត្ថកិច្ចចរាចរណ៍ជំនាញបានចុះមកធ្វើការវាស់វែង ដោយទុកឲ្យភាគីទាំងសងខាងដោះស្រាយចចារគ្នា តែដោះស្រាយមិនចេះសោះ ក៏ប្រគល់រថយន្តទាំង២ឲ្យសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌដូនពេញ ដើម្បីដោះស្រាយគ្នាតាមច្បាប់បន្តទៀត ៕