ខេត្តកំពង់ស្ពឺ ៖ ពិតជាសាហាវមែន ជនសង្ស័យជាឃាតកម្នាក់ ត្រូវបានកម្លាំងព្រហ្មទណ្ឌស្រុកសំរោងទង ការិយាល័យព្រហ្មទណ្ឌកម្រិតធ្ងន់ ធ្វើការស្រាវជ្រាវចាប់ឃាត់ខ្លួនបាន ក្រោយរត់គេចខ្លួនបានតែ៨ម៉ោងប៉ុណ្ណោះ បន្ទាប់ពីធ្វើសកម្មភាព ចាប់រំលោភស្ត្រីម្នាក់ ហើយសម្លាប់បំបិទមាត់ចោល កាលពីវេលាម៉ោង ៨និង៣០នាទី ថ្ងៃទី១៧ ខែមីនា ឆ្នាំ២០២១ នៅចំណុចខ្នងប្រឡាយ ភូមិវល្លិប្រេង ឃុំកាហែង ស្រុកសំរោងទង ខេត្តកំពង់ស្ពឺ។
សមត្ថកិច្ចបញ្ជាក់ថា ករណីឃាតកម្មរំលោភសម្លាប់នេះ សមត្ថកិច្ចដឹកនាំដោយលោក សម សាមួន ស្នងការនគរបាលខេត្ដកំពង់ស្ពឺ បញ្ជាកម្លាំងជំនាញពាក់ព័ន្ធចុះប្រតិបត្ដិការស្រាវជ្រាវ សហការជាមួយសាក្សី និងក្រុមគ្រួសារជនរងគ្រោះ បច្ចេកទេសកោសល្យវិច្ឆ័យ គ្រូពេទ្យ ក្រុមបច្ចេកវិទ្យា រហូតកំណត់មុខសញ្ញាជនដៃដល់បាន ហើយឈានដល់ការចាប់ឃាត់ខ្លួននៅម៉ោង៤ល្ងាច ថ្ងៃដដែល ។
ជនសង្ស័យជាឃាតក មានឈ្មោះ ប៉ិច ថន ភេទប្រុស អាយុ ៥៥ឆ្នាំ រស់នៅភូមិក្រាំងពោធិ ឃុំអូរ ស្រុកភ្នំស្រួច ខេត្តកំពង់ស្ពឺ ត្រូវបានសមត្ថកិច្ចព័ទ្ធចាប់បាន នៅចំណុចតាមផ្លូវប្រឡាយច្បារមន ស្ថិតនៅភូមិបុរីកម្មករ សង្កាត់ច្បារមន ក្រុងច្បារមន ខេត្តកំពង់ស្ពឺ បញ្ជូនមកអធិការដ្ឋាន នគរបាលស្រុកសំរោងទង ។
របាយការណ៍សមត្ថកិច្ចបញ្ជាក់ថា ជនសង្ស័យរូបនេះ បានសារភាពថា ខ្លួនពិតជាបានសម្លាប់ទៅលើជនរងគ្រោះពិតប្រាកដមែន ដោយចាប់រំលោភនាងសិន ទើបសម្លាប់បំបិទមាត់តាមក្រោយ ព្រោះខ្លាចជនរងគ្រោះប្តឹងសមត្ថកិច្ចឲ្យចាប់។
បច្ចុប្បន្ន ជនសង្ស័យខាងលើនេះ ត្រូវបានកម្លាំងអធិការដ្ឋាននគរបាលស្រុក កសាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាន នគរបាលខេត្ដកំពង់ស្ពឺ ដើម្បីបញ្ជូនខ្លួនទៅតុលាការផ្តន្ទាទោសតាមច្បាប់បន្តទៀត៕
