រាជធានីភ្នំពេញ ៖ មានការភ្ញាក់ផ្អើលខ្លាំងដល់បងប្អូនប្រជាពលរដ្ឋ ខណៈក្មេងស្ទាវ២ក្រុម ប្រដាប់ដោយរណាអារទឹកកក ដែកទីប និងកាំបិតបុ័ងតោ បានដេញកាប់គ្នាយ៉ាងប្រសាចពេញផ្លូវ រហូតមានម្ខាងបែកក្បាលហូរឈាមស្រោចខ្លួន និងម្ខាងទៀតត្រូវបានសមត្ថកិច្ចឃាត់ខ្លួនបញ្ជូនទៅកាន់ប៉ុស្តិ៍ភ្លាមៗផងដែរ កាលពីវេលាម៉ោងជិត២រសៀល ថ្ងៃទី១៥ ខែសីហា ឆ្នាំ២០២១ នៅចំណុចផ្លូវបេតុង ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

ប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ គេឃើញក្មេងស្ទាវម្នាក់ យកបាយមកឲ្យប្អូននៅចំណុចខាងលើ ពេលនោះមិនដឹងយ៉ាងម៉េច ស្រាប់តែមានក្មេងស្ទាវមួយក្រុមទៀត មានគ្នា ២នាក់ ចុះពីលើម៉ូតូមកកាប់ប្រហារ ក្មេងស្ទាវម្នាក់នោះតែម្ដង ហើយក៏វាយកាប់គ្នាទៅវិញទៅមក ប្រសាចពេញផ្លូវ បណ្តាលឲ្យម្ខាងរបួសស្រាល និងម្ខាងទៀតរងរបួសធ្ងន់ហូរឈាមសស្រាក់ពេញមុខតែម្តង។

បន្ទាប់ពីកើតហេតុភ្លាមៗ សមត្ថកិច្ចប៉ុស្តិ៍ទឹកថ្លា ក៏បានចុះមកដល់ ដោយឃាត់ខ្លួនភាគីម្ខាងដែលរងរបួសស្រាលនោះ រួមទាំងវត្ថុតាង មានទាំង រណាអារទឹកកក ដែកទីប និងកាំបិតបុ័ងតោទៅធ្វើការសាកសួរ ខណៈភាគីម្ខាងទៀតដែលរបួសធ្ងន់ គឺបញ្ជូនទៅសង្គ្រោះនៅមន្ទីរពេទ្យ ទាំងមិនដឹងថាខាងណាខុស ឬខាងត្រូវនោះឡើយ ៕