បន្ទាយមានជ័យ៖ឃាត់ខ្លួនក្មេងទំនើង៣នាក់ដែលកាប់រថយន្តសាម៊ុយរឺរថយន្តសង្គ្រោះបណ្តាលខូចខាតត្រូវបានបញ្ជូនទៅសាលាដំបូងខេត្តបន្ទាយមានជ័យថ្ងៃទី២៧ ខែមីនា ឆ្នាំ២០២១។
លោកឧត្តមសេនីយ៍ត្រី នូ ជីវ័ន្ត ស្នងការរង ទទួលការងារព្រហ្មត័ណ្ឌនៃស្នងការនគរបាលខេត្តបន្ទាយមានជ័យបានប្រាប់ថា៖ក្មេងដែលឃាត់៣នាក់ មាន១.ឈ្មោះ ខេង វាសនា ភេទប្រុសអាយុ១៨ឆ្នាំ ២.ឈ្មោះ ខេង សុឃីម ភេទប្រុសអាយុ២០ឆ្នាំ ៣.ឈ្មោះ ឈួន វីរៈ ហៅម៉ូវ ភេទប្រុសអាយុ១៧ឆ្នាំ ជនសង្ស័យទាំងនេះរស់នៅសង្កាត់/ក្រុងប៉ោយប៉ែត។
លោកបានបញ្ជាក់ថា៖កាលវេលាម៉ោង៩យប់ថ្ងៃទី២៦ ខែមីនា ឆ្នាំ២០២១នៅចំណុចផ្លូវលំស្ថិតភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត មានក្មេងទំនើង១ក្រុមបានធ្វើសកម្មភាពកាប់ទៅលើរថយន្តសាម៊ុយរឺរថយន្តសង្គ្រោះនៅមន្ទីពេទ្យក្រុងប៉ោយប៉ែត បណ្តាលរងការខូចខាតបែកថ្នាំ និងកំពិតទ្វាខាងស្តាំ បែកកញ្ចក់ខាងមុខ។
លោកឧត្តមសេនីយ៍ត្រី នូ ជីវ័ន្ត បានបញ្ជាក់ថា៖ក្រោយទទួលព័ត៌មានហើយកម្លាំងនគរបាលក្រុងប៉ោយប៉ែត បានធ្វើការស្រាវជ្រាវនិងកំណត់មុខសញ្ញាឃាត់ខ្លួនជនសង្ស័យ៣នាក់នៅថ្ងៃទី២៧ ខែមីនា ឆ្នាំ២០២១នៅចំណុចភូមិអូរឫស្សី សង្កាត់ផ្សារកណ្តាល ក្រុងប៉ោយប៉ែត ហើយនាំយកសាកសួរតាមចម្លើយសារភាពនិងវត្ថុតាងខូចខាតត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់៕ដោយ៖ចន្ត្រា
