ខេត្តកណ្តាល ៖ មានការភ្ញាក់ផ្អើលពេញផ្សារតាខ្មៅចាស់ ក្រុងតាខ្មៅ ខេត្តកណ្តាល កាលពីវេលាម៉ោង៧ព្រឹក ថ្ងៃទី២៨ ខែមីនា ឆ្នាំ២០២១ ក្រោយមានក្រុមចោរ បានធ្វើសកម្មភាព គាស់តូបលក់មាស និងតូបលក់ដូររបស់អាជីវក ចំនួន៤តូប លួចប្រមូលរុករើយកអស់គ្មានសល់ គិតជាទឹកប្រាក់អស់ជិត១ម៉ឺនដុល្លារអាមេរិចឯណោះ ខណៈម្ចាស់តូបគ្រាន់តែបើកទ្វារតូបភ្លាម ស្លុតស្មារតីតែម្តង ផ្អើលដល់សមត្ថកិច្ច ចុះមកពិនិត្យមើល និងស្រាវជ្រាវតាមរយៈកាមេរ៉ាសុវត្ថិភាព ដើម្បីស៊ើបអង្កេត និងកំណត់មុខសញ្ញាក្រុមចោរខាងលើ។
ប្រភពព័ត៌មានពីកន្លែងកើតហេតុ បញ្ជាក់ថា ជនរងគ្រោះ ទាំង៤នាក់ រួមមាន ៖
ទី១. ឈ្មោះ ផាន់ ឡា ភេទស្រី អាយុ ៤៨ឆ្នាំ មុខរបរលក់មាស ស្នាក់នៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល ត្រូវបានចោររុករើ ប្រមូលយក មាសធាតុផ្សំសម្រាប់ធ្វើផ្លាទីន ១កែវជ័រ ចំនួន៦០០ដុល្លារអាមេរិច, ត្បូងធម្មជាតិ ៦ប្រអប់ គិតជាទឹកប្រាក់ ចំនួន ៧០០០ដុល្លារអាមេរិច និងឧបករណ៍សម្រាប់មើលពេជ្រ១គ្រឿង តម្លៃ៦០០ដុល្លារអាមេរិច ។
២-. មានឈ្មោះ ឡ សុខហេង ភេទស្រី អាយុ៤២ឆ្នាំ មុខរបរលក់មាស ស្នាក់នៅភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល (គ្មានការបាត់បង់អ្វីនោះឡើយ) ។
៣. ឈ្មោះ កុល សុផារី ភេទស្រី អាយុ៣៨ឆ្នាំ មុខរបរលក់មាស (គ្មានការបាត់បង់អ្វីនោះឡើយ) ។
៤.ឈ្មោះ កុល រតនា ភេទស្រី អាយុ៤២ឆ្នាំ មុខរបរលក់មាស ស្នាក់នៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល ។
ពួកគាត់ទាំង៣នាក់ មិនមានការបាត់បង់នោះទេ ព្រោះមិនបានទុកសម្ភារៈនិងមាស ប្រាក់ក្នុងតូប បានប្រមូលយកទៅផ្ទះ ទោះបីត្រូវចោរគាស់តូបគាត់ក៏ដោយ។
អាជីវករងគ្រោះខាងលើ បានបញ្ជាក់ថា រាល់ថ្ងៃឲ្យតែម៉ោង៥ និង៣០នាទីល្ងាច ពួកគាត់បានរៀបចំបិទតូបលក់មាសរបស់ខ្លួន ហើយប្រមូលយកសម្ភារៈ លុយ និងមាសរបស់ខ្លួន ច្រកថង់យកទៅទុកនៅផ្ទះរៀងៗខ្លួនអស់ហើយ តែជនរងគ្រោះឈ្មោះ ផាន់ ឡា បានទុកខ្លះក្នុងតូប ហើយក៏ភ្លេចយកទៅមិនអស់ ត្រូវបានក្រុមចោរគាស់តូបទាំង៤ លួចអស់តែម្តង គិតជាទឹកប្រាក់អស់ជិត១ម៉ឺនដុល្លារ ខណៈតូបរបស់ពួកគាត់ក៏មានកាមេរ៉ាសុវត្ថិភាពផងដែរ តែភ្លើងផ្សារបានដាច់ ទើបមិនដឹង លុះព្រឹកឡើងមកបើកតូប បាត់អស់តែម្តង សល់តែវត្ថុតាង ទួណឺវីស១ និង ខ្សែលួស១ដុំតូច ឃើញ ស្នាម គាស់ឥវ៉ាន់រប៉ាត់រប៉ាយទើប ប្តឹង សមត្ថកិច្ចឲ្យចុះត្រួតពិនិត្យជាក់ស្តែង ៕
