ខេត្តបន្ទាយមានជ័យ ៖ បុរសម្នាក់ ត្រូវរថយន្តបុករបួសលើផ្លូវហើយរថយន្តនោះរត់បាត់ ក៏ត្រូវរថយន្ត១ផ្សេងទៀត មើលមិនឃើញកិនស្លាប់យ៉ាងរន្ធត់ កាលពីវេលាម៉ោង៧និង១៥នាទីយប់ ថ្ងៃទី២៩ ខែមីនា ឆ្នាំ២០២១ តាមបណ្តោយផ្លូវជាតិលេខ៦ ចំណុចស្ពានខ្សាច់ ក្នុងភូមិតាប៉ុន ឃុំទឹកជោ ស្រុកព្រះនេត្រព្រះ ខេត្តបន្ទាយមានជ័យ។

មន្ត្រីចរាចរណ៍ជើងគោកនៃអធិការដ្ឋាននគរបាលស្រុកព្រះនេត្រព្រះបានប្រាប់ថា ៖

តាមអ្នកឃើញហេតុការព៍គ្រោះថ្នាក់ចរាចរណ៍កើតឡើង គឺជនរងគ្រោះជាបុរសអាយុប្រមាណជាង២០ឆ្នាំ បានជិះម៉ូតូហុងដាឌ្រីមពាក់ស្លាកលេខ សៀមរាប 1N-3039 ជិះតាមបណ្តោយផ្លូវជាតិលេខ៦ ក្នុងទិសដៅពីកើតមកលិច ដល់ចំណុចស្ពានខ្សាច់ត្រូវរថយន្តបុកពីមុខពេញទំហឹងបណ្តាលដួលលើស្ពានហើយរថយន្តដែលបុកបានបើកទៅមុខគេចខ្លួនបាត់ ជនរងគ្រោះដែលលើដងផ្លូវគ្មានអ្នកឃើញ ហើយរថយន្ត១គ្រឿងទៀតបានកិនពីលើបណ្តាលជនរងគ្រោះស្លាប់ហើយរថយន្តបានបើកគេចបាត់។

មន្ត្រីនគរបាលចរាចរណ៍បានបញ្ជាក់ថា ៖ ក្រោយពេលគ្រោះថ្នាក់ចរាចរណ៍កើតឡើង បានចុះទៅពិនិត្យឃើញជនរងគ្រោះបានស្លាប់បាត់បង់ជីវិតលើស្ពានខ្សាច់ដោយស្លាកស្នាមត្រូវរថយន្តបុក ហើយគេចទៅបាត់ ក៏ត្រូវរថយន្ត១គ្រឿងទៀត បានកិនពីលើបណ្តាលស្លាប់នឹងកន្លែង ហើយជនរងគ្រោះមិនទាន់បានស្គាល់អត្តសញ្ញាណនៅឡើយ គ្រាន់តែដឹងថាអាយុប្រមាណជាង២០ឆ្នាំ និងម៉ូតូខូចខាត និងរថយន្ត ដែលបុកហើយកិនចំនួន២គ្រឿង មិនទាន់ស្គាល់អត្តសញ្ញាណនៅឡើយ កំពុងស្រាវជ្រាវរកចាប់អោយបានដើម្បីអនុវត្តតាមច្បាប់៕ ដោយ៖ចន្ត្រា