បាត់ដំបង៖ ពិតជារន្ធត់ណាស់ យ៉ាងហោចណាស់មនុស្សចំនួន៤នាក់ បានស្លាប់យ៉ាងរន្ធត់ជាប់ខាងក្រោមរថយន្ត ហើយត្រូវបានរថយន្តដឹកអង្កររាប់តោននោះក្រឡាប់សង្កត់ពីលើ ខណៈទំនងជាពួកគាត់នាំគ្នាហត់ចេញពីរថយន្តដែលជួបគ្រោះថ្នាក់ក្រឡាប់ កាលពីថ្ងៃទី៣០ ខែមីនា ឆ្នាំ២០២១ នៅចំណុចជើងភ្នំព្រឹក ផ្លូវជាតិលេខ៥៩ ក្នុងភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង។

សមត្ថកិច្ចបានបញ្ជាក់ថា រថយន្តដែលក្រឡាប់នេះ ជាប្រភេទរថយន្តហ៊ីយ៉ាន់ដាយ ណ៌ទឹកប្រាក់ ពាក់ស្លាកលេខ ត្បូងឃ្មុំ 3A-0409 របស់ក្រុមហ៊ុន អក្សរ K អ្នកបើកបរដោយបុរសម្នាក់ និងអ្នករួមដំណើរចំនួន០៣នាក់ទៀត តាមបណ្តោយផ្លូវខាងលើ លុះដល់ចំណុចកើតហេតុ ស្រាប់តែរថយន្តបានដាច់ហ្វ្រាំង ទើប បណ្តាលឲ្យក្រឡាប់សង្កត់លើជនរងគ្រោះទាំង៤នាក់ ស្លាប់យ៉ាងរន្ធត់តែម្តង។

ក្នុងនោះរួមមាន ៖ ទី១.ឈ្មោះ សួន សុជា ភេទប្រុស អាយុ១៧ ឆ្នាំ រស់នៅភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ (ស្លាប់) ,ទី២.ឈ្មោះ ឧត្តម អាយុប្រហែល២៥ឆ្នាំ រស់នៅខេត្តព្រៃវែង(ស្លាប់) ,ទី៣.ឈ្មោះ ម៉ៅ ភេទប្រុស អាយុ៣៣ ឆ្នាំ រស់នៅ ខេត្តកំពង់ស្ពឺ (ស្លាប់) ,ទី៤.ឈ្មោះ សីហា ភេទប្រុស អាយុប្រហែល ២៥ ឆ្នាំ (ស្លាប់) ។

សូមបញ្ជាក់ថា ករណីនេះបានបង្កការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋនាំគ្នាចោមរោមមើលជាច្រើននាក់ ខណៈពួកគាត់បាននិយាយគ្រប់គ្នាថា រន្ធត់ណាស់ ស្លាប់ម្តង៤នាក់ ហើយក៏ជាសារមួយ សូមបងប្អូនប្រជាពលរដ្ឋទាំងអស់ ចូលរួមគោរពច្បាប់ចរាចរណ៍ទាំងអស់គ្នា ។

ក្រោយកើតហេតុសមត្ថកិច្ចបានចុះមកធ្វើការពិនិត្យនៅទីតាំងកើតហេតុ ដោយមានទាំងប្រជាពលរដ្ឋផងនាំ បាននាំគ្នាជួយគាស់ ទាញសាកសពជនរងគ្រោះទាំង៤នាក់ចេញមកខាងក្រៅ ដាក់តម្រាបគ្នា និងធ្វើកំណត់ហេតុ ប្រគល់សពឲ្យសាច់ញាតិធ្វើបុណ្យតាមប្រពៃណី៕