រាជធានីភ្នំពេញ៖ ឃ្លាំងដាក់អីវ៉ាន់គ្រឿងសំណង់ និងកន្លែងកម្មករស្នាក់នៅមួយកន្លែងត្រូវបានអគ្គិភ័យឆាបឆេះ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចេញរថយន្ដពន្លត់អគ្គិភ័យជួយអន្តរាគមន៍ កាលពីវេលាម៉ោង៩យប់ ថ្ងៃទី៤ ខែមេសា ឆ្នាំ២០២១ នៅផ្លូវលេខ៣៥០ ស្ថិតក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

ប្រភពសមត្ថកិច្ចផ្នែកពន្លត់អគ្គីភ័យ បានឲ្យដឹងថា រថយន្តជាច្រើនគ្រឿងបានចេញមកជួយអន្តរាគមន៍ ក្នុងនោះមានរថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញចំនួន៨គ្រឿង ប្រើប្រាស់ទឹកអស់ចំនួន៤គ្រឿង ទើបគ្រប់គ្រងអគ្គិភ័យបានទាំងស្រុង ។

តាមការបញ្ជាក់ពីសមត្ថកិច្ចបានឲ្យដឹងថា មូលហេតុដែលកើតមានអគ្គីភ័យឆាបឆេះឃ្លាំងនេះ គឺបណ្តាលមកពីឆ្លងចរន្តអគ្គិសនី ហើយក្នុងហេតុការណ៍នោះដែរ មិនបណ្ដាលមានមនុស្សរងរបួសនោះទេ ខូចខាតតែសម្ភារៈមួយចំនួនតែប៉ុណ្ណោះ ៕