បន្ទាយមានជ័យ៖ប៉ូលិសបានឃាត់ខ្លួនគូរសង្សាធ្វើសកម្មភាពលួចម៉ូតូនៅពេលម្ចាស់ចូលកាត់សក់នៅថ្ងៃទី០៥ ខែមេសា ឆ្នាំ២០២១នៅចំណុចភូមិសូភី សង្កាត់កំពង់ស្វាយ ក្រុងសិរីសោភ័ណ។

ជុំវិញករណីខាងលើនេះបើតាមលោកវរៈសេនីយ៍ទោ ព្រហ្ម ប៊ុនធឿន នាយការិយាល័យព្រហ្មទ័ណ្ឌកម្រិតស្រាលនៃស្នងការដ្ឋាននគរបាលខេត្តបន្ទាយមានជ័យបានប្រាប់ថា៖ជនសង្ស័យដែលត្រូវឃាត់ខ្លួន២នាក់មាន១.ឈ្មោះ សេង ឌីណា ភេទប្រុសអាយុ៣០ឆ្នាំ ២.ឈ្មោះ លៀម ចាន់នី ភេទស្រីអាយុ២៥ឆ្នាំ(ជាសង្សា)ដែលស្នាក់នៅភូមិសូភី សង្កាត់កំពង់ស្វាយ ក្រុងសិរីសោភ័ណ។

លោកបានបញ្ជាក់ថា៖នៅពេលឃាត់ខ្លួនជនសង្ស័យគឺកម្លាំងនគរបាលជំនាញទទួលពាក្យបណ្តឹងឈ្មោះ សរ ប៊ុនខឹម ភេទប្រុសអាយុ៧៨ឆ្នាំរស់នៅភូមិព្រៃឫស្សី សង្កាត់ព្រៈពន្លា ក្រុងសិរីសោភ័ណ បាត់ម៉ូតូ១គ្រឿងធុនហុងដាឌ្រីម សេរីឆ្នាំ២០១៩ពណ៌ខ្មៅពាក់ស្លាកលេខបន្ទាយមានជ័យ1S.3628 កាលពីថ្ងៃទី០២ ខែមេសា ឆ្នាំ២០២១នៅមុខតូបកាត់សល់នៅភូមិខាងលើ នៅពេលម្ចាស់ម៉ូតូចាក់សោករហើយចូលកាត់សក់រួចហើយចេញមកវិញបាត់ម៉ូតូបានប្តឹងកម្លាំងជំនាញ។

លោកវរៈសេនីយ៍ទោ ព្រហ្ម ប៊ុនធឿន បានបញ្ជាក់ថា៖ក្រោយទទួលពាក្យបណ្តឹងហើយមន្ត្រីនគរបាលការិយាល័យជំនាញបានបើកការស្រាវជ្រាវនិងទទួលមុខសញ្ញានិងបង្ក្រាបឃាត់ខ្លួនជនសង្ស័យប្រុសស្រី២នាក់ដែលជាសង្សានិងរស់នៅជាមួយគ្នាដែលផ្សំគំនិតនិងរកឃើញម៉ូតូដែលបាត់បានមកវិញប្រគល់ជូនម្ចាស់ដើមនិងជនសង្ស័យ២នាក់នេះបានកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់៕ដោយ៖ចន្ត្រា