រាជធានីភ្នំពេញ ៖ ក្រុមអ្នកដឹកអាហារតាម App របស់ក្រុមហ៊ុន WOW NOW ជាច្រើននាក់ បាននាំគ្នាប្រមូលផ្ដុំគ្នា នៅខាងមុខសាខាក្រុមហ៊ុន ដែលស្ថិតនៅតាមបណ្តោយផ្លូវ៣១០ ដើម្បីធ្វើការតវ៉ាទាមទារ ឲ្យក្រុមហ៊ុនរក្សាតម្លៃឈ្នួលដឹក ឲ្យនៅដូចដើម
បន្ទាប់ពីក្រុមហ៊ុន បានប្រកាសទម្លាក់តម្លៃឈ្នួលដឹកទាបជាងមុន (មួយជើងបានត្រឹមតែ ៣០ ទៅ៣៥សេន) ។
ហេតុការណ៍នេះ បានបង្កការភ្ញាក់ផ្អើលយ៉ាងខ្លាំង នៅចំណុចមុខសាខាក្រុមហ៊ុន WOW NOW ស្ថិតនៅផ្លូវលេខ៣១០ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ នៅវេលាម៉ោង៣និង ១០នាទីរសៀល ថ្ងៃទី២៤ ខែសីហា ឆ្នាំ២០២៣នេះ ។
បើសម្ដីអ្នកដឹកជញ្ជូនអាហារក្រុមហ៊ុន WOW NOW បានលើកឡើងថា នេះជាលើកទី១ហើយ ដែលខាងក្រុមហ៊ុនបានកាត់បន្ថយប្រាក់ឈ្នួល ដោយបានដាក់កម្រិតអោយពួកគេថា មិនថាជិត ឬឆ្ងាយ ក៏បញ្ចុះមកនៅត្រឹមតែ៣០ទៅ៣៥សេន និងឆ្ងាយត្រឹម៥០សេនប៉ុណ្ណោះ ក្នុងមួយជើង និងដាក់លក្ខខណ្ឌទៀតថា អ្នកណាធ្វើបានក៏ធ្វើ អ្នកណាធ្វើមិនបាន គឺអាចឈប់បាន ដោយមិនខ្វល់ពីបុគ្គលិកឡើយ ។
ពួកគាត់បានបន្តថា បើគិតតម្លៃឈ្នួលដឹក ក្នុងមួយជើងត្រឹម៨០សេន តាមជិតតាមឆ្ងាយ ក្នុងមួយថ្ងៃពួកគាត់ ក្នុងម្នាក់ដឹកបានត្រឹម១០ទៅ១៥ជើងប៉ុណ្ណោះ ហើយទូទាត់ថ្លៃចាក់សាំង និងហូបបាយអស់ទៅហើយ ពួកគាត់នៅត្រឹមតែ១ម៉ឺនឬ២ម៉ឺនរៀលប៉ុណ្ណោះ។ បើក្រុមហ៊ុនទម្លាក់ថ្លៃដឹកក្នុងមួយជើង បានតែ៣៥ ទៅ៣៧សេន និងខ្ពស់បំផុតត្រឹមតែ៥០សេនប៉ុណ្ណោះ តើពួកគាត់ទៅជាយ៉ាងណា? ដូច្នេះហើយពួកគេជាអ្នកដឹកជញ្ជូនអាហារតាម App មួយជើងមិនបាន១ដុល្លារផង លើកដៃសំពះសូមដល់ ក្រសួង ស្ថាប័ន រួមទាំងថ្នាក់ដឹកនាំពាក់ព័ន្ធទាំងអស់ មេត្តាជួយរកដំណោះស្រាយជូនពួកគេទាំងអស់គ្នានេះផង ។
ទាំងនេះជាការលើកឡើងរបស់បុគ្គលិក អ្នកដឹកជញ្ជូន WOW NOW តែប៉ុណ្ណោះ មិនទាន់បានការបញ្ជាក់ពីក្រុមហ៊ុននោះទេ ៕ មេសា
.jpg?1692873174)
